Qytaıdyń Shanghai Construction Group Almatydaǵy ınfraqūrylymdyq jáne qalalyq jobalarǵa qatysu ayasyn keńeıtudí kózdep otyr, – dep habarlaıdy aqshamnews.kz tílshísí.
Būl turaly kompanıyanyń vıtse-prezıdentí Syue Yunshen «Almaty – Shanhaı» bıznes forumy barysynda málímdedí.
Onyń aıtuynsha, Qazaqstan «Bír beldeu – bír jol» bastamasyn júzege asyruda mańyzdy orynǵa ıe. Sońǵy jyldary Ortalyq Azıya būl bastamanyń negízgí baǵyttarynyń bíríne aınalyp otyr.
«Būl forum Qytaı men Qazaqstan arasyndaǵy ózara yqpaldastyqty tereńdetíp qana qoımaı, halyqtar arasyndaǵy sením men dostyqty nyǵaıtuǵa da yqpal etedí», – dedí Syue Yunshen.
Kompanıya ókílí Shanghai Construction Group Qazaqstan aumaǵynda bírqatar írí jobany júzege asyrǵanyn jetkízdí. Atap aıtqanda, ūlttyq avtojoldardyń jekelegen uchaskeleríníń qūrylysy ayaqtalyp, kólík ınfraqūrylymynyń sapasyn arttyruǵa múmkíndík berdí.
Sonymen qatar kompanıya «jasyl» energetıka baǵytynda da belsendí jūmys júrgízíp keledí. Onyń íshínde Qazaqstanda qoqys órteu zauytyn salu jobasyna qatysuda.
Almatyda kompanıya jańa bastamalardy íske asyrudy josparlap otyr. Olardyń qatarynda kórme ortalyǵyn salu jáne kólík júıesín keshendí josparlau jobalary bar. Būl jobalar qalalyq ınfraqūrylymdy damytuǵa, kólík júıesín jańǵyrtuǵa jáne turızm men bıznes úshín jańa tartymdy nysandar qalyptastyruǵa baǵyttalǵan.
«Būl jobalar qala ortasynyń sapasyn arttyryp qana qoımaı, Almatynyń ınvestıtsıyalyq áleuetín kúsheıtedí», – dedí ol.
Syue Yunshenníń aıtuynsha, kompanıya aldaǵy uaqytta da óńírdegí qatysuyn keńeıte túspek. Būl rette, olar jobalaudan bastap nysandardy tolyq paıdalanuǵa beruge deıíngí barlyq kezeńdí qamtıtyn keshendí tájírıbesíne súıenedí.
«Bíz Almatydaǵy seríktesterímízben bírlese otyryp, naqty jobalardy júzege asyruǵa jáne qalanyń tūraqty damuyna úles qosuǵa daıynbyz», – dep sózín túıíndedí ol.