Búgin Almatyda ǵaryshker, Halyq qaharmany Talǵat Musabaevty sońǵy saparǵa shyǵaryp salý rásimi ótti. Qoshtasý barysynda onyń áriptesi Toqtar Áýbákirov Talǵat Musabaevtyń erlikke toly ómir jolyn tebirene eske aldy, – dep habarlaıdy Aqshamnews.kz tilshisi.
"Qaı jerde júrsek te, qaı ǵarysh aılaǵynan ushsaq ta, qaıda ketsek te, biz árqashan óz kásibimizge, ǵaryshqa adal boldyq. Óıtkeni ǵarysh bizdi biriktirdi. Talǵat Amangeldiuly, sen Qazaqstan úshin kóp is tyndyrdyń. Sen naǵyz patrıot ediń. Muny men de, búkil halyq ta kórip, kýá boldy. Sen bárin taza júrekpen, adal nıetpen jasadyń. Eń mańyzdysy - sende árdaıym ózgelerde kezdespeıtin ıdeıalar boldy. Sol ıdeıalardy iske asyra aldyń. Saǵan sońǵy ret qosh aıtyp, otbasyńa, halqyńa myna nárseni jetkizgim keledi: Qazaqstan seni eshqashan umytpaıdy. Seniń atyń el tarıhynda máńgilikke jazyldy. Jatqan jeriń jaıly bolsyn, qymbatty dos!" - dedi Toqtar Áýbákirov.
Eske salaıyq, qoshtasý rásimine marqumnyń otbasy men týystary, áriptesteri men dostary, qoǵam jáne memlekettik mekemeler ókilderi qatysty. Qatysýshylar qatarynda QR Memlekettik keńesshisi Erlan Qarın, Qazaqstannyń tuńǵysh ǵaryshkeri Toqtar Áýbákirov, Halyq qaharmany, ushqysh-ǵaryshker Aıdyn Aıymbetov, Almaty qalalyq máslıhatynyń tóraǵasy Meıirjan Otynshıev, Qorǵanys jáne aeroǵarysh salasynyń basshylary boldy.
Aıta keteıik, memleket basshysy Qasym-Jomart Toqaev Talǵat Musabaevpen qoshtasý rásimin joǵary deńgeıde ótkizýge arnaıy tapsyrma bergen.