Magıstraldyq temirjol jelisiniń 8 obektisin tekserildi.
Qazaqstan temir joly kompanıasynyń 59 laýazymdy tulǵasy ákimshilik jaýapkershilikke tartyldy. Bul týraly Májilis depýtattarynyń saýalyna QR Bas prokýrory Berik Asylovtyń jaýabynda aıtylǵan, dep habarlaıdy Almaty-akshamy.kz QazAqparatqa silteme jasap.
«Osy jyly Kólik komıtetiniń aýmaqtyq bólimsheleri magıstraldyq temirjol jelisiniń 8 obektisin tekserdi. Nátıjeleri boıynsha ártúrli buzýshylyqtardy joıý týraly nusqama berildi. İshki ister mınıstrligi Indýstrıa jáne ınfraqurylymdyq damý mınıstrligimen jáne Qazaqstan temir jolymen birlesip, temirjol tóseminiń boıynda qorshaý qurylǵylarynyń bolýyna 1 022 tekserý júrgizdi. Onyń qorytyndysy boıynsha QTJ-ǵa 832 usynys engizildi. Ákimshilik quqyq buzýshylyq týraly kodekstiń 479-baby boıynsha QTJ-nyń 59 laýazymdy tulǵasy ákimshilik jaýapkershilikke tartyldy», - dedi Berik Asylov.
Onyń atap ótýinshe, QTJ poıyz qozǵalysynyń qaýipsizdigin qamtamasyz etý maqsatynda aldyn alý jumysyn júrgizip otyrady.
«Temir joldarǵa tikeleı jaqyn ornalasqan eldi mekenderdiń turǵyndaryna qaýiptiligi joǵary aımaqtaǵy tártip jáne mal jaıý erejeleriniń talaptary túsindirilip keledi. Bógde adamdardyń belgilenbegen jerlerden ótýine jol bermeý maqsatynda quqyq qorǵaý organdarymen birlesip, stansalardyń aýmaqtarynda reıdter júrgiziledi», - dedi ol.