Qazaqstandyq vaksına elimizde de, shetelde de úlken suranysqa ıe bolyp otyr.
Kúzge qaraı Jambyl oblysyndaǵy QazVac vaksınasyn shyǵaratyn zaýyt iske qosylady. Bul týraly QR Densaýlyq saqtaý mınıstri Alekseı Soı aıtty, dep habarlaıdy Almaty-akshamy.kz.
«Shynymen de qazaqstandyq vaksına elimizde de, shetelde de úlken suranysqa ıe bolyp otyr. Árıne, QazVac vaksınasynyń tanymaldyǵyn arttyrý jáne ony ózge elderge jetkizý jumystaryn júrgizý josparlanǵan. Prosedýra uzaqqa sozylady. Elderdiń vaksınany ózara moıyndaýy, jetkiziletin elde tirkelýi qajet. Bul jumystardy birtindep bastaımyz. Qazir bul vaksınany alýǵa nıet tanytqan seriktesterdi izdestirip jatyrmyz. Barlyq retteýshi quraldar iske qosylǵan», - dedi mınıstr Ortalyq komýnıkasıalar qyzmetindegi brıfıń barysynda.
Alekseı Soıdyń aıtýynsha, Jambyl oblysyndaǵy QazVac vaksınasyn shyǵaratyn zaýyttyń qurylysy aıaqtalýǵa jaqyn. Zaýyt iske qosylǵannan keıin ishki jáne syrtqy naryqty qajetti vaksınamen qamtamasyz etýge qaýqarly bolady.
«Zaýytty iske qosý jáne jóndeý jumystary aıaqtaldy. Qural-jabdyqtardy tekserý jumystary júrgizilip jatyr. Jambyl oblysy ákimdiginiń aqparatyna sáıkes, reglamentke baılanysty prosedýralar júrgizilý ústinde. Kúzge qaraı bul zaýyt iske qosylyp, óndiristik qýatyn birtindep arttyrýy tıis», - dedi mınıstr.