Bolonya qalasynda Qazaqstan úshín tarıhı mańyzy bar oqıǵa — qazaqy tazynyń World Dog Show 2026 baǵdarlamasyna qatysuy ayaqtaldy, – dep habarlaıdy aqshamnews.kz tílshísí.
Būl kórme álemdík kınologıyadaǵy eń mańyzdy árí bedeldí ís-sharalardyń bírí bolyp sanalady.
2026 jylǵy 2–7 mausym aralyǵynda halyqaralyq kınologıyalyq qauymdastyqtyń nazary Italıyaǵa audy. Bolonyada álemníń ártúrlí elderínen tóreshíler, sarapshylar, ósírushíler, ıeler jáne ūlttyq kınologıyalyq ūıymdardyń ókílderí jınaldy. Qazaqstan úshín būl ís-sharanyń orny erekshe boldy: álemdík kınologıyanyń basty alańdarynyń bírínde 2024 jyly FCI Halyqaralyq kınologıyalyq federatsıyasy tarapynan aldyn ala tanylǵan ūlttyq tūqym — Qazaqy tazy tanystyryldy.
Qazaqstan kınologtar odaǵynyń World Dog Show 2026 kórmesíne qatysuy tūqymdy túpkílíktí halyqaralyq tanuǵa baǵyttalǵan júıelí jūmystyń mańyzdy kezeńí boldy.
2 mausymda ótken FCI sudyalarynyń IV dúnıejúzílík kongresíne qatysu erekshe mańyzǵa ıe boldy. Būl — álemníń túkpír-túkpírínen tóreshí-sarapshylar jınalatyn kásíbı alań. Kongress ayasynda Qazaqstan kınologtar odaǵy qazaqy tazyǵa arnalǵan arnaıy dárís ūsyndy. Halyqaralyq tóreshíler korpusyna tūqymnyń tarıhy, qazaq halqynyń dástúrlí mádenıetímen baılanysy, tazynyń funktsıonaldyq maqsaty, tūqymdyq tıpí, ekstererí, ózíne tán qozǵalystary, temperamentí jáne rıngtegí saraptamalyq baǵalau erekshelíkterí tanystyryldy.
Būl format tūqymdy jaı ǵana tanystyru úshín emes, FCI sudyalary arasynda qazaqy tazy turaly dūrys kásíbı túsíník qalyptastyru úshín mańyzdy boldy. Būl aldyn ala halyqaralyq tanu kezeńínde erekshe mánge ıe, óıtkení tūqymnyń álemdík arenadaǵy árbír tanystyrylymy onyń árí qaraı qabyldanuyna, damuyna jáne túpkílíktí tanyluyna yqpal etedí.
Qazaqstannyń World Dog Show 2026 kórmesíne qatysuynyń mańyzdy bólígí Qazaqstan kınologtar odaǵynyń qazaqy tazyǵa arnalǵan prezentatsıyalyq stendíníń jūmysy boldy.
Qazaqstan stendí kórmeníń dál ortasynda ornalasyp, alǵashqy kúnnen bastap World Dog Show 2026 kórmesíndegí eń kózge túsetín árí kópshílík keletín alańdardyń bíríne aınaldy. Ol tóreshílerdíń, ósírushílerdíń, ıt ıeleríníń, ūlttyq kınologıyalyq ūıymdar ókílderíníń, kórme qonaqtarynyń jáne halyqaralyq BAQ-tyń nazaryn audardy.
Stendke kelgen qonaqtar qazaqy tazynyń tarıhymen, onyń funktsıonaldyq maqsatymen, tūqymdyq erekshelíkterímen, qazírgí asyl tūqymdyq jūmystyń jaı-kúıímen jáne Qazaqstannyń tazynyń shyqqan elí retíndegí rólímen tanysa aldy.
Stend tek aqparattyq alań ǵana emes, naǵyz tartymdy ortalyqqa aınaldy. Qonaqtar stendke úlken qyzyǵushylyqpen toqtap, Qazaqstan ókílderímen áńgímelesíp, onyń fonynda quana suretke tústí. Kóptegen qatysushylar men kórme qonaqtarynyń píkírínshe, Qazaqstannyń ūlttyq stendí World Dog Show 2026 kórmesíndegí eń jarqyn, mazmūndy jáne este qalarlyq stendterdíń bírí boldy.
Qatysudyń sharyqtau kezeńí 5 jáne 6 mausym kúnderí ótken qazaqy tazylardyń rıngtík kórsetílímderí boldy. Tūqym ókílderí bírden úsh mańyzdy kórmelík kezeńge qatysty: Club Show 2026, ENCI Winner 2026 jáne World Dog Show 2026.
Eń basty ortaq nátıje retínde mynany atap ótu qajet: barlyq qazaqy tazylar «úzdík» baǵasyn aldy. Būl ūsynylǵan ıtterdíń joǵary sapasyn ǵana emes, Qazaqstanda ūlttyq tūqymdy saqtau jáne damytu boıynsha asyl tūqymdyq jūmystyń júıelí árí dūrys jolǵa qoıylǵanyn dáleldeıdí.
2026 jylǵy 5 mausymda qazaqy tazy Club Show 2026 — Italıyanyń ūlttyq dárejedegí kórmesínde tanystyryldy.
Club Show 2026 qorytyndysy boıynsha úzdík jas arlan bolyp Astanadan kelgen Aktaban, úzdík jas ūrǵashy bolyp Almatydan kelgen Tabıgat tanyldy. Úzdík arlan ataǵyn Astanadan kelgen Lashyn, al úzdík ūrǵashy ataǵyn Astanadan kelgen Reya ıelendí. Salystyru qorytyndysy boıynsha tūqymnyń úzdík ókílí jáne Club Show 2026 jeńímpazy bolyp Lashyn tanyldy.
Sol kúní qazaqy tazylar ENCI Winner 2026 — halyqaralyq dárejedegí kórmege de qatysty. Úzdík jas arlan bolyp Almatydan kelgen Chelsı, úzdík jas ūrǵashy bolyp Almatydan kelgen Tabıgat tanyldy. Úzdík arlan ataǵyn Astanadan kelgen Pers, úzdík ūrǵashy ataǵyn Astanadan kelgen Reya ıelendí. Tūqymnyń úzdík ókílí jáne ENCI Winner 2026 jeńímpazy bolyp Pers tanyldy.
Perstíń tarıhı nátıjesín erekshe atap ótken jón: tūqym íshínde jeńíske jetkennen keıín ol óz jas sanatynda basqa borzylarmen básekege túsíp, 4-orynǵa ıe boldy. Qazaqy tazy úshín mūndaı deńgeıdegí halyqaralyq alańda būl mańyzdy jetístík jáne tūqymdy ílgeríletudegí jańa beles boldy.
2026 jylǵy 6 mausymda qazaqy tazy World Dog Show 2026 negízgí baǵdarlamasynda — FCI júıesíndegí álem chempıonatynda tanystyryldy.
World Dog Show 2026 qorytyndysy boıynsha úzdík jas arlan bolyp Almatydan kelgen Chelsı, úzdík jas ūrǵashy bolyp Almatydan kelgen Tabıgat tanyldy. Úzdík arlan ataǵyn Astanadan kelgen Lashyn, úzdík ūrǵashy ataǵyn Astanadan kelgen Reya ıelendí. Tūqymnyń úzdík ókílí jáne World Dog Show 2026 jeńímpazy bolyp Lashyn tanyldy.
Tūqym íshínde jeńíske jetkennen keıín Chelsı men Lashyn óz jas sanattarynda basqa borzylarmen básekení jalǵastyrdy. Keıíngí salystyru qorytyndysy boıynsha Chelsı 4-orynǵa ıe boldy. Būl qazaqy tazy úshín álemdík kórme arenasyndaǵy taǵy bír tarıhı nátıje boldy.
World Dog Show 2026 qorytyndysy boıynsha Jas álem chempıony ataqtaryn Chelsı men Tabıgat aldy. Álem chempıony ataqtaryn Lashyn men Reya ıelendí.
Osylaısha, kórmelík baǵdarlama qorytyndysy boıynsha Italıya chempıony ataqtaryn Daster, Lashyn, Reya, Pers, Arlan jáne Kerbez aldy, al Sarbaz chempıondar klasynda rezervtík jeńímpaz atandy. Italıyanyń jas chempıony ataqtaryn Chelsı, Tabıgat jáne Aktaban ıelendí.
Būl nátıjeler Qazaqstan úshín erekshe mańyzǵa ıe. Qazaqy tazy World Dog Show 2026 kórmesínde jaı ǵana tanystyrylyp qoıǵan joq — tūqym álemdík arenada ózín senímdí túrde kórsettí, joǵary saraptamalyq baǵa aldy, halyqaralyq qauymdastyqtyń nazaryn audardy jáne tūraqty tūqymdyq deńgeıín dáleldedí.
Qazaqstan kınologtar odaǵy úshín tıtuldar men jeńíster mańyzdy. Alaıda basty nátıje odan da keń: qazaqy tazy halyqaralyq kınologıyada tanyla túsude, al Qazaqstan tazynyń shyqqan elí jáne ony saqtau, damytu árí ílgeríletu boıynsha júıelí jūmystyń ortalyǵy retíndegí mártebesín naqty dáleldep otyr.
Qazaqstannyń World Dog Show 2026 kórmesíne qatysuyndaǵy erekshe jarqyn sátterdíń bírí qazaqy tazynyń TOP Dog 2026 halyqaralyq shouyna shyǵuy boldy.
TOP Dog — būl rıngtegí klassıkalyq saraptamalyq baǵalau emes, keń audıtorıyaǵa, medıaǵa jáne álemdík kórme qauymdastyǵyna arnalǵan áserlí halyqaralyq kórsetílím. Dál osy alańda tūqym tek mamandarǵa ǵana emes, myńdaǵan kórermenge óz elíníń mádenı beınesíníń bír bólígí retínde tanystyryldy.
Būl bedeldí alańda Qazaqstan alǵash ret ūsynyldy. Arenanyń basty ekranynda Qazaqstan Respublıkasynyń memlekettík tuy kórsetílíp, elímízdíń atauy halyqaralyq kınologıyalyq qauymdastyq aldynda jarıyalandy.
Qazaqstandy arenada Astanadan kelgen qazaqy tazy Daster, hendler Kamıbaeva Karına jáne Qazaqstan kınologtar odaǵynyń Prezıdentí Seríkqalı Bauyrjan tanystyrdy.
Būl jaı ǵana kórmelík epızod emes, qazaqy tazynyń shyqqan elí retínde Qazaqstandy álemdík kınologıyanyń basty alańdarynyń bírínde sımvoldyq túrde tanystyru boldy.
Tazynyń TOP Dog 2026 alańyna shyǵuy Qazaqstannyń World Dog Show 2026 kórmesíne qatysuynyń emotsıonaldy sharyqtau sátíne aınaldy. Būl alańda tazy ózíndík bolmysy bar, tanymal árí jahandyq kınologıyada óz ornyn aluǵa laıyq tūqym retínde kórsetíldí.
Eske sala keteıík, qazaqy ıt tūqymdaryn saqtau jáne damytu máselelerí Memleket basshysynyń tapsyrmasy boıynsha júıelí túrde damyp keledí. 2023 jylǵy 3 qańtarda osy jūmystyń qūqyqtyq negízín bekítken Qazaqstan Respublıkasynyń qazaqy ıt tūqymdaryn saqtau jáne ósímín molaıtu máselelerí jóníndegí Zańy qabyldandy.
2024 jylǵy 3 qyrkúıekte FCI «Qazaqy tazy» tūqymyn aldyn ala negízde tanyp, Qazaqstanǵa tūqymnyń shyqqan elí mártebesín bekíttí. Belgílengen kezeń íshínde Qazaqstan tūqymdy damytudy, túpkílíktí tanuǵa qajettí asyl tūqymdyq, kórmelík jáne ózge de derekterdí jınaudy jalǵastyruy qajet.
Qazaqy tazynyń Bolonyadaǵy World Dog Show 2026 kórmesíne qatysuy osy joldaǵy mańyzdy tarıhı qadam boldy. Búgín senímmen aıtuǵa bolady: qazaqy tazy halyqaralyq arenaǵa laıyqty túrde shyǵyp, jahandyq kınologıyada óz ornyn aıqyndap keledí.