Intellektualdy kómekshí qazaq, orys jáne aǵylshyn tílderínde jūmys ísteıdí, dep habarlaıdy aqshamnews.kz tílshísí.
Qazaqstan Respublıkasy Strategıyalyq josparlau jáne reformalar agenttígíníń Ūlttyq statıstıka byurosy jańartylǵan «Taldau» aqparattyq-taldamalyq júıesínde AI TALDAU ıntellektualdy kómekshísín íske qosty.
Endí qajettí statıstıkalyq derekterdí aluǵa, óńírler kórsetkíshterín salystyruǵa jáne olardyń dınamıkasyn jasandy ıntellekt kómegímen taldauǵa bolady.
AI TALDAU-dyń basty erekshelígí – statıstıkalyq aqparatty dıalog formatynda alu múmkíndígí. Paıdalanushylarǵa qajettí kórsetkíshterdí kóptegen kesteler men bólímderden óz betínshe ízdeudíń qajetí joq. Qajettí derekterdí alu úshín sūraq qoyu jetkílíktí.
Mysaly, «Pavlodar oblysynda sońǵy bes jylda ortasha jalaqy qalaı ózgerdí?» nemese «Qazaqstan óńírlerí boıynsha halyq sanyn salystyr» degen sūraqtar qoyuǵa bolady. AI TALDAU tıístí kórsetkíshterdí tauyp, derekterdí salystyrady, olardyń dınamıkasyn kórsetedí jáne negízgí úrdísterdí anyqtauǵa kómektesedí.
Sūrau nátıjelerí kesteler, grafıkter, dıagrammalar jáne taldamalyq materıaldar túrínde ūsynylady. Qajet bolǵan jaǵdaıda paıdalanushy sūraǵyn naqtylap, tolyǵyraq aqparat ala alady.
Intellektualdy kómekshí qazaq, orys jáne aǵylshyn tílderínde jūmys ísteıdí. Daıyn materıaldardy PDF, Word, PowerPoint jáne Excel formattarynda saqtauǵa bolady.
AI TALDAU-dy íske qosumen qatar «Taldau» júıesí de jańartyldy. Júıeníń dızaıny men navıgatsıyasy ózgertílíp, derekterdí ízdeu jáne taldau qūraldary jetíldíríldí.
Paıdalanushylarǵa óńírler, kezeńder jáne basqa da taldamalyq parametrler boıynsha egjeı-tegjeılí statıstıkalyq aqparat qoljetímdí. Júıede kestelerdí óz betínshe qalyptastyruǵa, grafıkter men dıagrammalar qūruǵa, kórsetkíshterdí salystyruǵa jáne nátıjelerdí jeke kabınette saqtauǵa bolady. Sonymen qatar derekterdí odan árí óńdeu jáne taldamalyq júıelerde paıdalanu úshín mashına oqıtyn formattarda júkteu múmkíndígí qarastyrylǵan.
«AI TALDAU kómegímen bírneshe saǵat jūmsap ízdeıtín aqparatty endí bírneshe sekundta aluǵa bolady. Sūraq qoyu jetkílíktí, júıe jarıyalanǵan resmı derekter negízínde jauap ūsynady. Men būl jobany ūlttyq statıstıkany damytudyń perspektıvaly baǵyttarynyń bírí dep sanaımyn. Bíz resmı statıstıkanyń árbír adamǵa qoljetímdí árí túsíníktí boluyna, al tehnologıyalardyń uaqytty únemdeuge jáne sapaly aqparat negízínde sheshím qabyldauǵa kómektesuíne ūmtyluymyz kerek», – dep atap óttí Ūlttyq statıstıka byurosynyń basshysy Maqsat Tūrlybaev.
Jańartylǵan «Taldau» júıesí men AI TALDAU ıntellektualdy kómekshísí azamattarǵa, kásípkerlerge, jurnalısterge, zertteushílerge, taldaushylarǵa jáne memlekettík organdarǵa arnalǵan.