14 qańtarda aıazǵa baılanysty Qazaqstannyń birneshe óńirinde ekinshi aýysymdaǵy mektep oqýshylary qashyqtan oqytý formatyna aýystyryldy, - dep habarlaıdy Aqshamnews.kz.
Pavlodar oblysy Pavlodar qalasynyń barlyq mektepterinde ekinshi aýysymdaǵy sabaqtar onlaın formatta ótedi. Qalada aýa temperatýrasy −29°C, jeldiń jyldamdyǵy 4 m/s.
Sondaı-aq Ekibastuz jáne Aqsý qalalarynda 1–9 synyptyń ekinshi aýysym oqýshylary qashyqtan bilim alady.
Aqmola oblysynda aýa temperatýrasynyń −28°C-qa deıin tómendeýi jáne jeldiń 3 m/s bolýy sebepti Kókshetaý qalasyndaǵy barlyq mektep oqýshylary onlaın formatqa kóshirildi. Osyndaı sheshim oblystyń barlyq aýdandarynda qabyldandy.
Qostanaı oblysynda −25°C aıaz ben jeldiń 5 m/s jyldamdyǵyna baılanysty Qostanaı qalasynda 1–4 synyptyń ekinshi aýysym oqýshylary mektepke barmaıdy. Sondaı-aq onlaın format Áýlıekól, Uzynkól, Altynsarın, Meńdiqara, Jitiqara, Fedorov, Beıimbet Maılın, Qarabalyq aýdandarynda, Lısakovsk pen Rýdnyı qalalarynda engizildi. Qarsý aýdanda 2–6 synyp oqýshylary onlaın bilim alady.
Atyraý oblysynyń Inder aýdanynda kóktaıǵaqqa baılanysty 15 mekteptiń 0–11 synyp oqýshylary qashyqtan oqytý formatyna kóshirildi. Barlyǵy 383 synyp, 6 560 oqýshy mektepke barmaıdy.
Soltústik Qazaqstan oblysynda aýa temperatýrasynyń kúrt tómendeýine baılanysty ınternattyq uıymdardy qospaǵanda, oblystaǵy barlyq mektepterdiń 72 433 oqýshysy qashyqtan oqytýǵa kóshirildi. Internattarda turatyn 1 028 oqýshy qalypty rejımde oqýdy jalǵastyryp jatyr.
Astana qalasynda ekinshi aýysymda 0–9 synyp oqýshylary sabaqqa barmaı, qashyqtan oqıdy.