Qazaqstandyq oqushylar IBO-2025 halyqaralyq bıologıya olımpıadasynan 100 paıyzdyq nátıje kórsettí, dep habarlaıdy Aqshamnews.kz.
Fılıppınde ótken álemdík deńgeıdegí eń bedeldí zıyatkerlík dodalardyń bírí – Halyqaralyq bıologıya olımpıadasynda (IBO-2025) Qazaqstan qūramasynyń barlyq tórt múshesí de qola medal ıeleníp, komandalyq tolyq jeńíske qol jetkízdí.
Bıylǵy dodaǵa 80 memleketten 320-dan astam daryndy oqushy qatysty. Qazaqstan atynan synǵa túsken jas bıologtar – Pavlodar oblysyndaǵy «Bílím-ınnovatsıya» lıtseı-ınternatynyń 10-synyp oqushysy Ersūltan Qaıyrken, Óskemendegí Nazarbaev Zıyatkerlík mektebíníń 11-synyp oqushysy Batyr Erjanūly, Astanadaǵy NZM-níń 12-synyp oqushysy Aıǵanym Baltasheva jáne Almatydaǵy «Bílím-ınnovatsıya» lıtseıíníń 8-synyp oqushysy Alıhan Ashyrhanov – barlyǵy da qola medal jeńíp aldy.
Ūlttyq qūramaǵa bıologıya salasynyń jas zertteushílerí Leıla Asqarova men Ilyas Sakımov jetekshílík ettí.
Olımpıada ekí kezeńnen tūrdy: teorıyalyq bólímde qatysushylar molekulalyq bıologıya, genetıka, ekologıya, evolyutsıya jáne bıojúıeleu baǵyttary boıynsha kúrdelí tapsyrmalardy oryndasa, praktıkalyq kezeńde naqty zerthanalyq jūmystar arqyly óz bílímderí men daǵdylaryn kórsettí.
Aıta keteıík, Qazaqstan 1994 jyldan berí IBO olımpıadasyna tūraqty túrde qatysyp keledí. Osy aralyqta el qorjynynda – 2 altyn, 18 kúmís, 56 qola medal jáne 12 qūrmet gramotasy bar. Al ótken jyly būl baıqau alǵash ret Qazaqstanda ūıymdastyrylyp, ūlttyq komanda taǵy da 100 paıyzdyq nátıjege qol jetkízgen edí.