Qazaqstandyq oqushylar AQSh-ta ótken halyqaralyq robototehnıka turnırlerínde írí jeńísterge qol jetkízdí, – dep habarlaıdy aqshamnews.kz tílshísí.
Kalıfornıya shtatynyń Long-Bıch qalasynda Western Edge Premier Event 2026 turnırí óttí. Jarysqa álemníń 11-den astam elínen kelgen 88 úzdík komanda qatysty. Turnır jas ınjenerlerdí, baǵdarlamashylardy jáne qūrastyrushylardy bíríktíríp, olar robottardy jobalau, avtonomdy baǵdarlamalau, komandalyq jūmys jáne kúrdelí tehnıkalyq míndetterdí sheshu boıynsha óz sheberlíkterín kórsettí.
Qazaqstan namysyn Almaty qalasynyń PHOBOS, Qazaq Style jáne UlyDala komandalary, sondaı-aq Aqtóbe qalasynyń GAMBIT komandasy qorǵady.
Eń joǵary nátıjege PHOBOS komandasy qol jetkízdí. Oqushylar turnırdíń eń bedeldí marapattarynyń bírí Inspire Award syılyǵyn ıeleníp, Sea Division Winning Alliance Captain ataǵyna ıe boldy. Keıín chempıondyq alyansty bastap, Western Edge Premier Event 2026 turnıríníń absolyuttí jeńímpazy atandy. Komanda jarys barysynda matchtarda da, sarapshylar baǵalauynda da tūraqty joǵary nátıje kórsetíp, ınjenerlík sheshímderíníń sapasy men daıyndyq deńgeıímen tóreshílerdíń joǵary baǵasyna ıe boldy.
GAMBIT komandasy ınjenerlík sheshímderí men tehnıkalyq qūjattamasynyń joǵary deńgeıí úshín Think Award 2nd Place marapatyna ıe boldy. UlyDala komandasy pleı-off kezeńíne joldama aldy, al Qazaq Style komandasy baǵdarlamalau men ınjenerlík ázírlemeler boıynsha joǵary nátıje kórsettí. Qatysushylar ózderíníń tehnıkalyq jobalaryn tanystyryp, robottardy ázírleu tájírıbesímen bólístí jáne ózge elderdíń komandalarymen tájírıbe almasty.
Taǵy bír írí jetístíkke Shymkent qalasy Abaı audanynyń Zıyatkerlík mektebíníń Atomic Heart komandasy qol jetkízdí.
Kentukkı shtatynyń Leksıngton qalasynda álemníń úzdík FTC komandalary qatysqan Run for the Robots Premier Event halyqaralyq turnırí óttí. Jarys barysynda qatysushylar tehnıkalyq sūhbattardan ótíp, ınjenerlík jurnaldaryn qorǵady jáne bírneshe tartysty matchta robottarynyń tıímdílígín kórsettí.
Jarys qorytyndysy boıynsha Atomic Heart komandasy Man o’ War dıvızıonynda Inspire Award marapatynyń ıegerí atandy. Būl FIRST Tech Challenge júıesíndegí eń bedeldí marapat bolyp sanalady jáne robototehnıka, ınjenerlík qūjattama, jobany tanystyru, qoǵamdyq qyzmet jáne tálímgerlík baǵyttary boıynsha úzdík nátıje kórsetken komandaǵa beríledí. Būl marapat komandanyń jan-jaqty damyǵanyn jáne tehnıkalyq jetístíkterdí kóshbasshylyq qasıettermen árí STEM baǵyttaryn nasıhattaumen ūshtastyra alatynyn kórsetedí.
Oqushylardyń jetístíkterí júıelí daıyndyqtyń, tálímgerler qoldauynyń jáne jastardyń ınjenerlík ǵylymdarǵa degen qyzyǵushylyǵynyń arqasynda álemdík deńgeıdegí írí jarystarda joǵary nátıjelerge qol jetkízuge bolatynyn taǵy bír márte dáleldedí.