Qazaqstandyq oqushylar halyqaralyq bílím dodasynda taǵy bír tarıhı jetístíkke qol jetkízdí. Būl joly astanalyq mektep oqushysy Europalyq deńgeıdegí bedeldí olımpıadada top jaryp, el abyroıyn asqaqtatty, – dep habarlaıdy aqshamnews.kz tílshísí.
Astanadaǵy Spectrum International School-dyń 12-synyp oqushysy Marǵūlan Sharel Europalyq matematıkalyq olımpıadanyń absolyuttí jeńímpazy atandy. Būl turaly Stan.kz habarlady.
Oqu-aǵartu mınıstrlígíníń málímetínshe, 2026 jylǵy 23–29 sáuír aralyǵynda Lıtvanyń Vılnyus qalasynda alǵash ret European Mathematical Olympiad ótken. Atalǵan dodaǵa 19 elden 21 komanda, jalpy 126 oqushy qatysqan.
Qatysushylar qatarynda Albanıya, Armenıya, Bolgarıya, Estonıya, Fınlyandıya, Frantsıya, Gruzıya, Islandıya, Irlandıya, Qazaqstan, Kosovo, Latvıya, Lıtva, Soltústík Makedonıya, Norvegıya, Polsha, Slovenıya, Shveıtsarıya jáne Ukraına elderí boldy.
Mınıstrlík taratqan aqparatqa sáıkes:
“QR ūlttyq qūramasy joǵary nátıje kórsetíp, komandalyq esepte 1-oryndy jeńíp aldy. Qūrama qorjynyna 3 altyn jáne 2 kúmís medal tústí. Olımpıadanyń absolyut jeńímpazy atanǵan – Marǵūlan Sharel”, – delíngen habarlamada.
Sonymen qatar qazaqstandyq oqushylardyń taǵy bírnesheuí júldeger atandy. Atap aıtqanda, Almaty qalasyndaǵy Nazarbaev Zıyatkerlík mektebíníń 11-synyp oqushysy Eldar Usenov pen Haileybury mektebíníń 11-synyp oqushysy Erık Lım altyn medal ıelendí. Al Erasyl Altynbek pen Anuar Aǵybaev kúmís júldege qol jetkízdí.