Qazanda qazaqstandyqtar oftalmologıalyq aýrýlardy emdeý úshin zeınetaqy jınaqtaryn paıdalaný jóninde 15,4 myń ótinish berdi. Olardyń jalpy somasy 13,3 mlrd teńgege jetti, - dep habarlaıdy aqshamnews.kz tilshisi Birinshi kredıttik búroǵa silteme jasap.
Bul kórsetkish qyrkúıekpen salystyrǵanda 10 esege jýyq, al 2025 jyldyń qańtar-tamyz aılaryndaǵy ortasha deńgeıden 73 esege joǵary boldy. Buǵan deıin kóz emdeýge baılanysty jalpy tólemder kólemi bir aıdaǵy qazirgi nátıjege áreń jetken edi.
Tólemderdiń kúrt artýy qyrkúıekte kúshine engen stomatologıalyq emge zeınetaqy jınaǵyn paıdalanýǵa tyıym salýmen baılanysty. Osyǵan deıin emge berilgen tólemderdiń basym bóligi tis emdeýge arnalǵan bolatyn.
"Qazanda stomatologıalyq maqsattaǵy ótinishter oryndalǵan joq, alaıda buryn berilgen ótinishter boıynsha qarajatty qaıtarý jalǵasty", – dep atap ótti búro.
Qarajatty qaıtarý ótinish berýshi sheshimin ózgertken, qujat tapsyrmaǵan nemese qarajatty maqsatsyz paıdalanbaq bolǵan jaǵdaılarda júrgiziledi. Kóz aýrýlaryn emdeýge baılanysty da mundaı jaǵdaılar tirkelgen. Bul – 730 mln teńge bolatyn 901 ótinish nemese qazan aıyndaǵy jalpy tólemderdiń shamamen 6%-y.
Zeınetaqy jınaǵyn turǵyn úı jaǵdaıyn jaqsartýǵa paıdalaný da belsendi túrde jalǵasýda:
- 138,4 myń ótinish oryndaldy (+7%),
- jalpy soma – 79,9 mlrd teńge (+9%).
Turǵyn úıge baılanysty qarajat qaıtarý da qalypty deńgeıde – 12,6 mlrd teńgege 16,3 myń ótinish.