Qazaqstanda eń tómengi jalaqy mólsheri ósýi múmkin. Bul týraly búgin Májiliste usynyldy, - dep habarlaıdy aqshamnews.kz tilshisi.
2025 jyly elimizde eń tómengi jalaqy mólsheri - 85 000 teńge.
Búgin Májiliste 2026–2028 jyldarǵa arnalǵan respýblıkalyq búdjet týraly zań jobasy qaralyp jatyr. Qujatqa berilgen qorytyndyda depýtattar eń tómengi jalaqyny ósirýdi usynǵany aıtylǵan.
"Halyqaralyq Eńbek Uıymynyń usynystary negizinde ázirlengen eń tómengi jalaqyny anyqtaýdyń jańa ádistemesiniń qabyldanýyna baılanysty, Májilistiń áleýmettik‑mádenı damý komıteti eń tómengi jalaqy mólsherin 85 000 teńgeden 110 000 teńgege ósirýdi qajet dep esepteıdi", - delingen qujatta.
Eń tómengi jalaqy - bul zańmen belgilengen eń az jalaqy mólsheri, tolyq eńbek aıy úshin jumys berýshi osydan tómen tólem tólemeýge tıis. Bul kórsetkish jumysshylardy memlekettik kepildik arqyly qorǵaýǵa jáne eńbek aqyny retteý, sondaı‑aq, túrli áleýmettik tólemderdi esepteý úshin qoldanylady.