Qazaqstan temir joly keıingi 10 aıda 30 adamnyń qatysýymen apat bolǵanyn málimdedi, - dep habarlaıdy Aqshamnews.kz tilshisi.
"Qazaqstan temir joly" ulttyq kompanıasy temirjol nysandarynda tirkelgen jazataıym oqıǵalar boıynsha dabyldy statısıka jarıalady. 2025 jyldyń alǵashqy 10 aıynda el boıynsha poıyzdyń adamdardy qaǵý deregi 30 ret tirkelgen. Oqıǵalar saldarynan 34 adam zardap shegip, onyń 15-i qaza tapqan, 19-y túrli jaraqat alǵan. Jábirlenýshilerdiń qatarynda úsh kámeletke tolmaǵan jasóspirim bar.
Kompanıa málimetinshe, oqıǵalardyń basym bóligi azamattardyń temirjolda júrý erejelerin óreskel buzýynan bolǵan. Zardap shekkenderdiń 40%-y (12 adam) oqıǵa kezinde mas kúıde bolǵan. Basqa jaǵdaılarda adamdar qulaqqap kıip júrgen. Bir sýısıd faktisi de tirkelgen.
Sonymen qatar keıingi 10 aıda temirjolda 24 jol-kólik oqıǵasy bolǵan, onyń úsheýine jolaýshylar poıyzdary qatysqan.
QTJ, áskerı kúzet jáne jelilik polısıa birlesip 1 570 reıd júrgizip, 2 105 turǵyn jınalysyn uıymdastyrǵan. Nátıjesinde erejeni buzǵandarǵa 39 ákimshilik aıyppul salynǵan.
Kompanıa temirjoldaǵy qaýipsizdik eń aldymen azamattardyń jaýapkershiligine baılanysty ekenin atap ótip, joldy tek belgilengen jerden kesip ótýge jáne temirjol mańynda asa saq bolýǵa shaqyrdy.