Būrynǵy ūlttyq qūramanyń bas bapkerí Serík Sársembaıūly Berdalın 79 jasynda dúnıeden óttí, dep habarlaıdy Aqshamnews.kz tílshísí.
Belgílí maman ūzaqqa sozylǵan syrqatynan keıín ómírden ozǵan. Qaraǵandynyń «Shahtyor» kluby qaraly habardy resmı túrde rastady.
Klub málímdemesínde Serík Berdalınníń taǵdyry qazaq futbolymen tyǵyz baılanysty bolǵany atap ótíldí. Ol bapkerlíkke «Shahtyor» klubynda alǵashqy qadamdaryn jasap, 1965 jyly komanda dublínde oınaı bastady. 1966 jylǵy mausymda «A» klasy sanatynda úsh match ótkízíp, bír gol soqqan. Keıín «Metallurg»/«Stroıtel» (Temírtau) komandalarynda óner kórsetíp, 1973–1975 jyldary «Shahtyor» sapynda qorǵaushy retínde mansabyn ayaqtaǵan.
Bapker retínde de Berdalın eleulí jetístíkterge jettí: 1995 jyly «Shahtyormen», al 1998 jyly «Ertíspen» Qazaqstan chempıonatynyń qola júldegerí atandy. Ol jas oıynshylardyń damuyna, qaraǵandylyq klubtyń qalyptasuyna jáne jalpy otandyq futbolǵa úlken úles qosty.
«Serík Sársembaıūly – óz ísíníń has sheberí ǵana emes, árdaıym shabyt beríp, qoldau kórsetíp, shákírtteríne sením ūyalata bílgen jan edí. Onyń jarqyn beınesí áríptesteríníń, jaqyndarynyń, shákírtteríníń jáne futboldy súıetín barlyq jannyń júregínde saqtalady», – delíngen «Shahtyor» habarlamasynda.
Serík Berdalın «Jetísu», «Esíl» komandalaryn jáne 1995–1997 jyldary Qazaqstan ūlttyq qūramasyn basqardy. Keıín Qazaqstan Respublıkasynyń futbol jóníndegí memlekettík trenerí qyzmetín atqardy.
Ol – Qazaqstan Respublıkasynyń eńbek síńírgen jattyqtyrushysy, QR eńbegí síńgen sport qaıratkerí, sondaı-aq 1995 jylǵy «Jyldyń úzdík bapkerí» ataǵynyń ıegerí.
Marqūmnyń otbasyna, tuǵan-tuystary men qazaq futbol qauymdastyǵyna qaıǵyra kóńíl aıtamyz.