Halyqaralyq saýdanyń ósýi jáne aýyl sharýashylyǵy ónimderiniń aınalymynyń artýy jaǵdaıynda fıtosanıtarıalyq qaýipsizdik máseleleri erekshe mańyzǵa ıe bolyp otyr, - dep habarlaıdy Aqshamnews.kz.
Zerthanalyq zertteýlerdi qosa alǵanda, karantınge jatqyzylatyn ónimdi tıimdi baqylaý – ishki naryqty qorǵaýdyń jáne azyq-túlik qaýipsizdigin qamtamasyz etýdiń mańyzdy quraly.
2025 jylǵy 24 qarashadan bastap Shyǵys Qazaqstan, Mańǵystaý, Túrkistan, Abaı jáne Jetisý oblystarynda karantındik fıtosanıtarıalyq saraptamany aqyly negizde júrgizýdiń jańa tártibi pılottyq rejımde engizildi. Bul sheshim Ózbekstan, Ázerbaıjan, Qytaı, Belarýs jáne Reseı tájirıbesin eskere otyryp qabyldandy jáne kórshiles memlekettermen teń jaǵdaı qalyptastyrýǵa baǵyttalǵan. Saraptamany «Fıtosanıtarıa» SHJQ RMK júrgizedi.
Jańa tártiptiń tıimdi jumys isteýi úshin atalǵan oblystarǵa karantınge jatqyzylatyn ónim jetkiziletin baqylaý pýnktteri aıqyndaldy. Eksporttalatyn ónimge arnalǵan zerthanalyq saraptama elimizdiń barlyq óńirinde uıymdastyrylǵan.
Tártipti engizýge deıin syrtqy saýda qyzmetine qatysýshylarmen túsindirý kezdesýleri ótkizildi. Terıtorıalyq bólimsheler men zerthanalardyń mamandary qajetti oqytý kýrsynan ótti. Inspeksıa basshylaryna saraptamalardyń sapaly jáne ýaqytyly júrgizilýin qamtamasyz etý tapsyryldy.
Jańa tártip fıtosanıtarıalyq qyzmetterdiń sapasyn arttyrýǵa múmkindik beredi dep kútilýde. Saraptamalardan túsetin qarajat salany damytýǵa – zerthanalyq jabdyqtardy jańartýǵa, materıaldyq-tehnıkalyq bazany nyǵaıtýǵa jáne mamandardyń biliktiligin arttyrýǵa baǵyttalatyn bolady.