Búgín – qazaq muzyka tarıhynda «Qazaq valsí», «Būlbūl» ánderín jáne Ahmet Jūbanovpen bírlesíp jazǵan «Abaı» operasyn dúnıege ákelgen kórnektí kompozıtor, Qazaq KSR halyq ártísí, Qazaq KSR Memlekettík syılyǵynyń laureaty Latıf Hamıdıdíń tuǵan kúní. Ókíníshke qaraı, ūlttyq muzyka mádenıetíne ólsheusíz úles qosqan tūlǵanyń tuǵan kúní men shyǵarmashylyq mūrasy kóp jaǵdaıda keńínen atalyp óte bermeıtín, eleusíz qalyp qoyatyn kezeńder de az bolǵan joq. Bıyl kompozıtordyń 120 jyldyq mereıtoıyna oraı būl olqylyqtyń orny tolyp, Qūrmanǵazy atyndaǵy Qazaq ūlttyq konservatorıyasynda «Latıf Hamıdı jáne Qazaqstannyń muzykalyq mádenıetí» atty respublıkalyq ǵylymı dóńgelek ústel ūıymdastyryldy.
Ís-sharanyń maqsaty – kórnektí kompozıtordyń shyǵarmashylyq mūrasyn qazírgí muzykatanu ǵylymynyń ózektí máselelerí tūrǵysynan zerdeleu, onyń qazaq kásíbı muzykasynyń qalyptasuy men damuyna qosqan úlesín jan-jaqty talqylau, sondaı-aq ǵylymı zertteulerdíń jańa baǵyttaryn aıqyndau boldy.
Dóńgelek ústel Qūrmanǵazy atyndaǵy Qazaq ūlttyq konservatorıyasynyń ǵylymı-ınnovatsıyalyq qyzmet, shyǵarmashylyq damu jáne halyqaralyq yntymaqtastyq jóníndegí prorektory, ónertanu kandıdaty Aızada Saıfollaqyzy Núsípova men Bolgarıyadaǵy Pancho Vladıgerov atyndaǵy Ūlttyq muzyka akademıyasynyń Teorıya, kompozıtsıya jáne dırıjerlík fakultetíníń professory Emılıya Krsteva Kolarova-Gıdıshkanyń qūttyqtau sózderímen ashyldy.
Ís-sharanyń qūrmettí qonaqtary retínde kompozıtor, Qazaq KSR halyq ártísí, Qazaq KSR Memlekettík syılyǵynyń laureaty Latıf Hamıdıdíń nemeresí Renat Radıkovıch Hamıdı men shóberesí Emır Rınatovıch Hamıdı qatysty. Olardyń qatysuy mereıtoılyq jıynnyń taǵylymdyq mánín arttyra tústí.
Emır Hamıdı, Renat Hamıdı, Saıda Elemanova, Beıbít Dáldenbaı, Aınūr Qaztuǵanova, Meruert Myltyqbaeva
Dóńgelek ústelge joǵary oqu oryndarynyń professor-oqytushylar qūramy, ǵylymı-zertteu ınstıtuttarynyń qyzmetkerlerí, doktoranttar men magıstranttar qatysyp, Latıf Hamıdıdíń kompozıtorlyq, etnomuzykatanushylyq, pedagogıkalyq jáne oryndaushylyq mūrasyna arnalǵan bayandamalar jasady.
Baǵdarlama ayasynda M.O.Áuezov atyndaǵy Ádebıet jáne óner ınstıtutynyń Muzykatanu bólímíníń meńgerushísí, ónertanu ǵylymdarynyń kandıdaty, qauymdastyrylǵan professor Aınūr Jasaǵanbergenqyzy Qaztuǵanova «QR Ǵylym akademıyasy muzykatanushylarynyń eńbekteríndegí Latıf Hamıdı shyǵarmashylyǵy» atty bayandamasynda írgelí zertteulerde jáne baspasóz betterínde Latıf Hamıdı turaly jazǵan ǵalymdardyń maqalalaryna sholu jasap, ásírese Latıf Hamıdıdíń adamgershílík qasıetín baǵalaǵan ǵalymdardyń píkíríne toqtaldy. Būl rette Ahmet Jūbanovtyń: «Onyń kímge bolsa da qamqorlyǵy mol, adal da elgezek jan. Ne aıtsań da elpektep, kóńíldí qaıtarmaıdy. Jáne sál nársege balasha quanyp, keıde ókpelep te qalady...», – degen estelígín keltírdí. Bayandamashynyń aıtuynsha, būl píkír kompozıtordyń zamandastary jadynda eń aldymen úlken júrektí, keńpeıíl adam retínde saqtalǵanyn aıqyn kórsetedí.
Qazaq ūlttyq konservatorıyasynyń kameralyq hory
Qūrmanǵazy atyndaǵy Qazaq ūlttyq konservatorıyasynyń dotsentí, ónertanu ǵylymdarynyń kandıdaty Meruert Shyraqbaıqyzy Myltyqbaeva «Latıf Hamıdıdíń án shyǵarmashylyǵy turaly» bayandamasynda kompozıtordyń vokaldyq mūrasynyń stıldík jáne kórkemdík erekshelíkterín qarastyrdy.
Qazaqstannyń eńbek síńírgen qaıratkerí, fılosofıya doktory (PhD), qauymdastyrylǵan professor, Qazanǵap atyndaǵy Qyzylorda joǵary muzyka kolledjíníń dırektory Músílím Baltabaıūly Ámze «Latıf Hamıdı jáne qazaq dırıjerlík ónerí» taqyrybynda kompozıtordyń dırıjerlík mekteptíń qalyptasuyna qosqan úlesín saralady. Qūrmanǵazy atyndaǵy Qazaq ūlttyq konservatorıyasynyń doktoranty Janna Kambarbekqyzy Qydyrnıyazova «Qazaqstan kompozıtorlary shyǵarmalaryndaǵy Jambyl poezıyasynyń retseptsıyasy» atty bayandamasynda Jambyl poezıyasynyń kásíbı muzykadaǵy kórínísín taldady.
T.Júrgenov atyndaǵy Qazaq ūlttyq óner akademıyasynyń dotsentí, QR mádenıet qaıratkerí Mūrat Qazenūly Ábuǵazy «Dombyra kúılerín notaǵa túsírudegí Latıf Hamıdıdíń úlesí» atty bayandamasynda kompozıtordyń qazaq kúı mūrasyn notaǵa túsírudegí ǵylymı-praktıkalyq qyzmetín paıymdap, Táttímbet kúılerín alǵash ret júıelí túrde notaǵa túsíríp, ūlttyq kúı mūrasyn saqtaudaǵy eńbegíníń tarıhı mańyzyn aıqyndady. Qūrmanǵazy atyndaǵy Qazaq ūlttyq konservatorıyasynyń aǵa oqytushysy, ónertanu ǵylymdarynyń magıstrí Jūldyz Jahanshaqyzy Túlkíbaeva «Latıf Hamıdıdíń kórkemdík ámbebaptyǵy: etnografıya jáne janrlyq jańashyldyq» bayandamasynda kompozıtor shyǵarmashylyǵynyń etnografıyalyq jáne janrlyq erekshelíkterín ashyp kórsettí.
Qūrmanǵazy atyndaǵy Qazaq ūlttyq konservatorıyasynyń doktoranty Bıbígúl Tólegenqyzy Tólegenova «A.Jūbanov pen L.Hamıdıdíń “Abaı” operasyndaǵy Shabal beınesí» taqyrybynda atalǵan operadaǵy keıípkerdíń muzykalyq-dramaturgıyalyq sıpatyn qarastyrdy. M.O.Áuezov atyndaǵy Ádebıet jáne óner ınstıtutynyń Muzykatanu bólímíníń kíshí ǵylymı qyzmetkerí, ónertanu magıstrí Gauhar Álıhanqyzy Mukasheva «Estrada jūldyzdarynyń oryndauyndaǵy L.Hamıdıdíń «Būlbūl” ání» bayandamasynda shyǵarmanyń ártúrlí oryndaushylyq ınterpretatsıyalaryn salystyrmaly tūrǵydan taldady.
Qūrmanǵazy atyndaǵy Qazaq ūlttyq konservatorıyasynyń dotsentí, pedagogıka ǵylymdarynyń kandıdaty Aıgúl Tíllyabekqyzy Imasheva «Latıf Hamıdıdíń muzykalyq-pedagogıkalyq mūrasy» taqyrybynda kompozıtordyń pedagogıkalyq qyzmetí men ádístemelík mūrasynyń mańyzyn aıqyndady. Konservatorıya oqytushysy, ónertanu ǵylymdarynyń magıstrí Ǵanı Amangeldíūly Mahanov «L.Hamıdıdíń qazaq halyq ánderín horǵa óńdeudegí kompozıtorlyq tásílderí» atty bayandamasynda kompozıtordyń horǵa laıyqtau ádísterín ǵylymı tūrǵydan sıpattady.
L.Hamıdıdíń nemeresí Renat jáne shóberesí Emır
Dóńgelek ústeldíń qorytyndy bayandamasyn Qūrmanǵazy atyndaǵy Qazaq ūlttyq konservatorıyasynyń professory, M.O.Áuezov atyndaǵy Ádebıet jáne óner ınstıtutynyń Muzykatanu bólímíníń jetekshí ǵylymı qyzmetkerí, ónertanu ǵylymdarynyń kandıdaty, professor Aqlıma Qaıyrdenqyzy Omarova jasady. «Latıf Hamıdı: “Molodost vechnyh melodıı”» atty bayandamasynda ǵalym kompozıtordyń shyǵarmashylyq mūrasyndaǵy aǵartushylyq qyzmetín arhıvtík qūjattar, fotosuretter, qoljazbalar men jarıyalanymdar negízínde saralap, onyń tarıhı jáne qazírgí mádenı keńístíktegí mańyzyn aıqyndady. A.Q.Omarova bayandamasynda: «Arhıvtík qūjattar, fotosuretter, qoljazbalar men jarıyalanymdar Latıf Hamıdıdí tek kórnektí kompozıtor ǵana emes, adamdardy bíríktíre bílgen, jan dúnıesí keń, shyǵarmashylyq jalynyn ómír boıy saqtaı bílgen tūlǵa retínde tanytady», – dep atap óttí.
Ǵylymı baǵdarlama kontserttík bólímmen tolyqtyryldy. Kontsertte Latıf Hamıdıdíń keńínen tanymal shyǵarmalary oryndaldy. Atap aıtqanda, «Qazaq valsín» Dınara Jūmaǵalı, «Aqqudy» Aısūlu Tūrymbek, «Būlbūl» ánín Arujan Alpysbaeva oryndady. Kúısandyqta Qazaqstannyń eńbek síńírgen qaıratkerí Gúlnar Shahanqyzy Jıdılova súıemeldedí.
Dınara Jūmaǵalı, Arujan Alpysbaeva
Sondaı-aq Qūrmanǵazy atyndaǵy Qazaq ūlttyq konservatorıyasynyń kameralyq hory kórkemdík jetekshísí jáne dırıjerí, professor, «Dırıjerleu» kafedrasynyń meńgerushísí, «Mádenıet salasynyń úzdígí» Ǵalymjan Berekeshevtíń óńdeuíndegí Kenen Ázírbaevtyń «Kóksholaq» ánín joǵary kásíbı deńgeıde oryndady. Hordyń áserlí oryndauy kórermenderdíń ystyq yqylasyna bóleníp, kontserttík baǵdarlamanyń jarqyn qorytyndysyna aınaldy.
Dóńgelek ústel Latıf Hamıdı mūrasynyń uaqyt ótken saıyn ózektílígín joǵaltpaı, kerísínshe jańa ǵylymı qyrlarymen tanylyp kele jatqanyn kórsettí. Arhıvtík derekter men zamanauı zertteuler toǵysqan būl ǵylymı basqosu kompozıtor eńbegín jańa kózqaraspen baǵalauǵa jol ashyp, onyń qazaq muzyka mádenıetíndegí kompozıtor, etnomuzykatanushy, pedagog jáne oryndaushy retíndegí kópqyrly qyzmetín jańa ǵylymı tūjyrymdar negízínde zerdeleuge múmkíndík berdí. Būl basqosu Latıf Hamıdıdíń ūlttyq muzyka tarıhyndaǵy aıryqsha ornyn taǵy bír márte aıqyndap, ūlt ruhanıyatynyń altyn qoryna aınalǵan shyǵarmashylyq mūrasyn keıíngí ūrpaqqa tereń tanytuǵa qyzmet ettí.
Aınūr Qaztuǵanova, M.O.Áuezov atyndaǵy Ádebıet jáne óner ınstıtutynyń «Muzykatanu» bólímíníń meńgerushísí, ónertanu ǵylymdarynyń kandıdaty, qauymdastyrylǵan professor