Bes jyldan astam uaqyt boıy Azamat Ahmetov «Qazaqtelekom» AQ Qaraǵandy qoljetímdílík jelísín paıdalanu departamentíníń (DESD) jelílík resurstarǵa tehnıkalyq qoldau kórsetu ortalyǵynda telekommunıkatsıya jelísí jabdyqtarynyń ınjenerí bolyp jūmys ísteıdí. Būl kóp oılanyp, sanaly túrde tańdalǵan mamandyq boldy. Azamat árdaıym zamanauı tehnologıyalar, tehnıkalyq protsesterdíń qyr-syryn meńgeru, aqaulardyń sebepterín anyqtauǵa qyzyǵyp, jelíníń úzdíksíz jūmysyn qamtamasyz etetín sheshímderdí tapqysy keletín. Búgínde onyń míndetíne jabdyqtyń jaı-kúıín baqylau, aqaulardy taldau jáne joyu, tehnıkalyq jūmystardy oryndau jáne jelílík resurstardyń tūraqty jūmysyn qamtamasyz etu kíredí. Mamannyń aıtuynsha, telekommunıkatsıya salasy únemí damyp keledí, sonymen bírge jańa míndetter men kásíbı ósuge jańa múmkíndíkter paıda boluda.
Azamattyń jūmys kúní qauípsízdík mınutynan bastalady. Būl uaqytta áríptesterímen bírge yqtımal táuekelder men olardyń aldyn alu sharalary talqylanady. Odan keıín mamandar jabdyqtarǵa monıtorıng júrgízíp, apattyq jáne tehnıkalyq ótínímderdí óńdeuge, aqaulardy anyqtap, joyuǵa kírísedí. Qajet bolǵan jaǵdaıda jūmys tíkeleı nysandarda jalǵasady. Erekshe mūqıyattylyqty telekommunıkatsıyalyq jabdyqtardy baptau men tehnıkalyq qyzmet kórsetuge, sondaı-aq apattyq jaǵdaılardy joyuǵa baılanysty míndetter talap etedí. «Kez kelgen qatelík kóptegen abonentter úshín baılanys sapasyna áser etuí múmkín, sondyqtan jaǵdaıdy mūqıyat taldap, bekítílgen reglamentterdí saqtau mańyzdy», – deıdí Azamat.
Óndírístík qauípsízdík máselelerí maman jūmysynda erekshe oryn alady. Telekommunıkatsıya salasynda qyzmetkerler kún saıyn tehnıkalyq tūrǵydan kúrdelí jabdyqtarmen, elektr qondyrǵylarymen jáne joǵary táuekel faktorlarymen jūmys ísteıtíndíkten, qauípsízdík kásíbı mádenıettíń mańyzdy bólígí bolyp sanalady. Bıyl Azamat «Qazaqtelekom» AQ Óndírístík qauípsízdík dırektsıyasy Jas Telecom jastarynyń qatysuymen ūıymdastyrǵan «Men jáne qauípsízdík» baıqauynyń jeńímpazy atandy. Onyń baıqau jūmysynyń negízgí ıdeyasy – qauípsízdík ár qyzmetkerdíń jeke jauapkershílígínen bastalady degen ūstanym boldy. «Típtí eń tıímdí erejeler men nūsqaulyqtar da adam olardy sanaly túrde saqtaǵan jaǵdaıda ǵana nátıje beredí», – dep esepteıdí ol.
Būl ūstanymdy onyń jeke tájírıbesínen de kóruge bolady. Óndírístík míndetterdíń bírín oryndau barysynda qauíptí jaǵdaıǵa ákeluí múmkín mán-jaılar anyqtaldy. Jūmysty oryndau merzímíníń shekteulí boluyna qaramastan, protsestí uaqytsha toqtatu, táuekelderdí qosymsha baǵalau jáne anyqtalǵan kemshílíkterdí joyu turaly sheshím qabyldandy. Nátıjesínde jūmys qauípsíz túrde jáne eshqandaı oqıǵasyz ayaqtaldy. «Būl jaǵdaı der kezínde jūmysty toqtatyp, eńbek jaǵdaılaryn qaıta tekseru – kúrdelí saldardyń aldyn aluǵa múmkíndík beretínín kórsettí», – deıdí maman. Azamattyń aıtuynsha, mūndaı jaǵdaılar táuekelderdí der kezínde baǵalau men dūrys sheshím qabyldaudyń mańyzdylyǵyn taǵy bír márte dáleldeıdí.
Jas áríptesteríne ınjener bílím aludan qoryqpauǵa, sūraq qoıyp, tálímgerlerdíń keńesíne mūqıyat qūlaq asuǵa keńes beredí. Onyń aıtuynsha, tájírıbe uaqyt óte kele keledí, al qauípsízdík alǵashqy jūmys kúnínen bastap basymdyq boluy tıís. Azamattyń píkírínshe, dál osyndaı jūmysqa degen kózqaras ūjymda qauípsíz eńbek mádenıetín qalyptastyruǵa yqpal etedí.