Dárígerge erte júgíníp, emdí uaqtyly bastaǵan kezde jekelegen jaǵdaılarda ūrpaq órbítu qabíletín saqtap, bolashaqta ana atanu múmkíndígí bar, dep habarlaıdy aqshamnews.kz tílshísí.
Qazaq onkologıya jáne radıologıya ǵylymı-zertteu ınstıtutynyń onkologtary úsh áıelge endometrıı obyryn emdegennen keıín ana atanu múmkíndígín saqtap qaluǵa kómektestí. Jeke tańdalǵan em men medıtsınalyq baqylaudyń nátıjesínde patsıentter dení sau balalardy dúnıege ákeldí.
Jas áıel úshín «endometrıı obyry» dıagnozy kúrdelí emníń qajettígín ǵana emes, bala súyu múmkíndígínen aıyrylu qaupín de bíldíruí múmkín. Alaıda onkologıyalyq kómektíń zamanauı ádísterí jekelegen jaǵdaılarda ūrpaq órbítu qabíletín saqtap qaluǵa múmkíndík beredí. Qazaq onkologıya jáne radıologıya ǵylymı-zertteu ınstıtutynda em alǵan úsh patsıenttíń tarıhy emdeuge jeke kózqarastyń áıelderdíń ana bolu armanyn júzege asyruǵa qalaı kómektesetínín kórsetedí.
Qūpıyalylyqty saqtau maqsatynda materıaldaǵy patsıentterdíń esímderí ózgertílgen.
Osyndaı patsıentterdíń bírí — Shyǵys Qazaqstan oblysynyń tūrǵyny Kamıla V. 2021 jyly jas áıelge endometrııdíń endometrıoıdty adenokartsınomasy dıagnozy qoıylǵan. Dıagnoz anyqtalǵannan keıín oǵan jatyrdy alyp tastau ūsynylǵan. Alaıda Kamıla ana boludy armandap, ūrpaq órbítu qabíletín saqtauǵa baǵyttalǵan em múmkíndígín paıdalanuǵa sheshím qabyldaǵan.
Tekseruden ótíp, jeke emdeu taktıkasy aıqyndalǵannan keıín oǵan levonorgestrel bóletín jatyríshílík júıení qoldanu arqyly gormondyq terapıya taǵaıyndaldy. Em mamandardyń baqylauymen júrgízíldí.
2022 jylǵy 5 qyrkúıekte Kamıla dení sau qyz balany dúnıege ákeldí. Qazír ol ūzaq merzímdí remıssıyada jáne jūbaıymen bírge kópten kútken qyzyn tárbıelep otyr.
Mańǵystau oblysynyń tūrǵyny Sanıya Z. da osyndaı joldan óttí. Oǵan da endometrııdíń endometrıoıdty adenokartsınomasy dıagnozy qoıylǵan. Dárígerler gormondyq terapıyany qoldana otyryp, aǵzany saqtauǵa baǵyttalǵan em júrgízdí.
Emnen keıín Sanıya júktí boldy. 2023 jylǵy 15 qańtarda júktílíktíń 38-aptasynda kesar tílígí arqyly salmaǵy 3200 gramm dení sau ūl balany dúnıege ákeldí. Qazír patsıent ūzaq merzímdí remıssıyada jáne ūlyn tárbıelep otyr.
Úshínshí patsıent — Valerıya M.-nyń tarıhy ekí eldíń mamandaryn bíríktírdí. Endometrıı obyry anyqtalǵannan keıín jas áıel Qazaqstanda em ala bastady. Júktílík kezínde ol otbasymen bírge Ońtústík Koreyaǵa kóshtí.
Araqashyqtyqqa qaramastan, qazaqstandyq jáne ońtústíkkoreyalyq dárígerlerdíń ózara ís-qımylynyń arqasynda medıtsınalyq súıemeldeu jalǵasty. Mamandar baılanysta bolyp, sonyń íshínde telemedıtsınalyq konsultatsıyalar ótkízdí. Nátıjesínde Valerıya aman-esen bosanyp, dení sau balany dúnıege ákeldí.
«Jas áıelder úshín onkologıyalyq dıagnoz kóbíne ana bolu múmkíndígínen aıyrylyp qalu qorqynyshymen qatar júredí. Qazírgí medıtsına jekelegen jaǵdaılarda endometrııdíń qaterlí ísíkterí kezínde de ūrpaq órbítu qabíletín saqtauǵa múmkíndík beredí. Būl rette sheshím aurudyń satysy, ísíktíń morfologıyalyq sıpattamalary jáne tekseru nátıjelerí eskeríle otyryp, ár patsıent úshín jeke qabyldanady. Basty basymdyq árdaıym patsıenttíń onkologıyalyq qauípsízdígí bolyp qala beredí», — dedí onkogınekologıya ortalyǵynyń dáríger-onkogınekology Dauren Kaldybekov.
QazOjRǴZI-da emdeu taktıkasyn tańdaǵan kezde NCCN (AQSh-tyń Ūlttyq keshendí onkologıyalyq jelísí) jáne ESGO (Europalyq gınekologıyalyq onkologıya qoǵamy) halyqaralyq klınıkalyq ūsynymdary eskeríledí.
Ūrpaq órbítu qabíletín saqtau máselelerí onkogınekologtar, dárílík terapıya dárígerlerí jáne reproduktologtar kíretín multıdıstsıplınarlyq mamandar tobynyń qatysuymen qaralady.
Aǵzany saqtauǵa baǵyttalǵan terapıya patsıentterdí mūqıyat íríkteudí, tūraqty tekserudí jáne emníń tıímdílígín baqylaudy talap etedí. Būl ádís endometrıı obyryna shaldyqqan barlyq áıelge bírdeı jaramaıdy jáne tek tıístí medıtsınalyq kórsetílímder bolǵan jaǵdaıda qoldanylady.
«Búgínde onkologtardyń míndetí qaterlí ísíktí emdeumen ǵana shektelmeıdí. Patsıentterdíń ómír sapasyn múmkíndígínshe saqtau da mańyzdy. Būl áıelderdíń tarıhy erte dıagnostıkanyń, jeke tásíldíń jáne mamandar arasyndaǵy ózara ís-qımyldyń qanshalyqty mańyzdy ekenín kórsetedí. Bala súyudí armandaıtyn patsıentter úshín ūrpaq órbítu qabíletín saqtau múmkíndígíníń mání zor», — dep atap óttí QazOjRǴZI onkogınekologıya ortalyǵynyń jetekshísí Erlan Kukubasov.
Kamıla, Sanıya jáne Valerıyanyń tarıhy otandyq onkologıyadaǵy derbestendírílgen emdeu tásílíníń múmkíndíkterín kórsetedí. Dárígerlerdíń kásíbılígí, ár patsıentke jeke kózqaras, zamanauı emdeu ádísterí jáne júıelí medıtsınalyq baqylau áıelderge dertpen kúrestíń kúrdelí jolynan ótíp qana qoımaı, ana bolu armanyn júzege asyruǵa kómektestí.
Densaulyǵyńyzǵa qamqor bolyp, profılaktıkalyq tekserulerden uaqtyly ótíńíz jáne dárígerge júgínudí keıínge qaldyrmańyz. Esíńízde bolsyn: endometrıı obyry — auyr dıagnoz. Alaıda dárígerge erte júgíníp, emdí uaqtyly bastaǵan kezde jekelegen jaǵdaılarda ūrpaq órbítu qabíletín saqtap, bolashaqta ana atanu múmkíndígí bar.