Prezıdent Qasym-Jomart Toqaev Qurylys kodeksi men «Qazaqstan Respýblıkasynyń keıbir zańnamalyq aktilerine sáýlet, qala qurylysy jáne qurylys máseleleri boıynsha ózgerister men tolyqtyrýlar engizý týraly» zańǵa qol qoıdy, dep habarlaıdy Aqshamnews.kz tilshisi.
Eki qujattyń da mátini baspasózde jarıalanady.
Esterińizge salaıyq, Parlament 29 jeltoqsan kúni Qurylys kodeksin qabyldap, prezıdenttiń qaraýyna joldaǵan. Jańa kodeks pen oǵan ilespe zań aıasynda qurylys naryǵy sýbektileriniń rólin saralaý jáne naqtylaý, otandyq ǵylymdy qoldaý jáne qurylys týraly sheshimder qabyldaý kezinde jurtshylyqtyń qatysýy kózdelgen. Sondaı-aq memlekettik baqylaý jónindegi sharalar kúsheıtildi, bul sapaly qala qurylysyn josparlaý men qurylysty qamtamasyz etedi.
Sondaı-aq seısmıkalyq qaýipti aýmaqtardaǵy qurylys talaptary kúsheıtilip, qala qurylysyn josparlaý kezinde seısmıkalyq mıkroaımaqtaý kartalaryn mindetti esepke alý tártibi engiziledi. Qurylys kodeksi qajetti ınjenerlik izdenim jumysyn júrgizbeı turyp jobalyq qujattamany daıyndaýǵa jáne nysandardy salýǵa tyıym salady. Eger qurylystyń tyǵyzdyǵy, ǵımarattardyń bıiktigi nemese áleýmettik ınfraqurylymmen qamtamasyz etý normalary buzylsa, egjeı-tegjeıli josparlaý jobasyna ózgeris engizýge bolmaıdy.
Jańa Qurylys kodeksinde sıfrlandyrý máselelerine de erekshe nazar aýdarylǵan.