Prezıdenttíń qatysuymen Auyl sharuashylyǵy eńbekkerleríníń ekínshí forumy óttí.
Jıynda Memleket basshysy jaıylymdyq jerler auyl tūrǵyndaryna jáne naqty jospary bar ınvestorlarǵa beríluge tıís ekendígín aıtty, - dep habarlaıdy Aqshamnews.kz.
"Ekínshí. Būl – jer máselesí. Halyq jerdíń ıgílígín kóruí kerek. Men bírneshe jyl būryn zańsyz alynǵan jáne ıgerílmeı bos jatqan jerlerdí qaıtaryp alu turaly naqty tapsyrma berdím. Búgín osy másele boıynsha mınıstr bayandady. 2022 jyldan berí 14 mıllıon gektardan astam auyl sharuashylyǵy jerí memleketke qaıtaryldy. Jerdí qolynan ís keletín, jūmys ísteuge nıettí azamattarǵa beru kerek degen tapsyrma bírneshe ret aıtyldy. Alaıda, būl mańyzdy jūmys bayau júrgízílíp jatyr. Sondyqtan Joldauda memleketke qaıtarylǵan jerdí kelesí jyldyń ortasyna deıín túgeldeı tūraqty aınalymǵa engízu turaly tapsyrma beríldí. Ákímdíkterdíń osy máselege qatysty josparlary qaǵaz júzínde qalyp qoımauy kerek. Eń bastysy, jer taǵy da ıgerílmeı, bos qalmauy qajet" - dep tapsyrdy Prezıdent.
Úkímet qazír mal sharuashylyǵy salasyndaǵy bıznestí qoldau josparyn ázírlep jatyr.
"Jaıylymdyq jerler auyl tūrǵyndaryna jáne naqty jospary bar ınvestorlarǵa beríluge tıís. Kelesí jyldyń ortasynda qabyldanatyn būl qūjatta osy máseleníń sheshímderí aıqyn kórsetíluí kerek. Taǵy bír túıtkíl – jerge beríletín kepíldík qūnnyń tómen boluy. Kadastrlyq baǵalau júıesí qazírgí naryqtaǵy shynaıy ahualǵa múldem sáıkes kelmeıdí. Úkímet būl máselege nazar audaruy kerek, kadastrlyq qūndy aıqyndau tásílín qaıta qarauǵa tıís. Jer qatynastary salasyndaǵy kedergíler qazírgí zamanǵa saı sharuashylyqtar qūruǵa bóget bolyp otyr. Men Joldauymda Úkímetke kelesí jyldyń sońyna deıín Jer resurstarynyń bíryńǵaı tsıfrlyq kartasyn ázírleudí tapsyrdym. Qūzyrly mınıstrlíkter osy mańyzdy jūmys boıynsha ne ístelíp jatqanyn 7 kúnníń íshínde bayandauy kerek", - dep naqtylady Memleket basshysy.
Kelesí másele retínde Prezıdent jer telímderíníń elektrondy konkurs arqyly beríluí kerektígíne toqtaldy.
"Jer alǵan azamattardyń eń basty míndetí – jerdí tıímdí ıgeru, yaǵnı, berílgen jerdí kádege jaratu. Būǵan qosa, jer resurstaryna monıtorıng júrgízu tásílderín qaıta qarau qajet. Qazír auyl sharuashylyǵy jerleríne qatysty derekter tolyq emes. Mūndaı ahual jerge baqylau jasauǵa jáne ıgerílmeı bos jatqan jerlerdí qaıtaryp aluǵa kedergí keltíredí. Jerdí bólíp-taratu úderísí boıynsha aqparat ashyq árí qoljetímdí boluy qajet", - dedí Prezıdent Qasym-Jomart Toqaev.