Almatynyń tarıhı ortalyǵynda qoǵamdyq keńístík bírtíndep retke kele bastady. Qazír Jíbek jolynan Raıymbek dańǵylyna deıíngí Panfılov kóshesíníń bólígí de jańartylyp jatyr. Aumaǵy 1,7 gektar bolatyn būl aumaq ūzaq uaqyt boıy jańǵyrmaǵan. Endí ol qala ortalyǵyndaǵy jayau júrgínshíler keńístígíníń zańdy jalǵasyna aınalyp, mūnda qauípsíz árí funktsıonaldy qoǵamdyq orta qalyptaspaqshy.
Aumaqty abattandyrudy tūrǵyndardyń ózí ūsynyp, «Halyq qatysatyn byudjet» (HQB) baǵdarlamasy arqyly bekítíldí. Keıín joba audannyń qosymsha qarjylandyruymen qoldau tapty. Almaly audanynyń ákímí Arman Shamshın press-tur barysynda būl joba Almaty-2 temírjol vokzalyna aparatyn mańyzdy tranzıttík baǵytta tūrǵyndar úshín jaıly árí jaryq qoǵamdyq orta qalyptastyrudy kózdep otyrǵanyn aıtty.
Qūrylys jūmys bıylǵy 18 mamyrda bastaldy. Jobada mıkroklımatty jaqsartyp, jayau júrgínshílerdí shańnan qorǵauǵa kóp kóńíl bólíngen. 1,0 gektar aumaqty túgel kógaldandyrmaqshy. Mūnda qoldanystaǵy aǵashtar saqtalyp, qūnarly qara topyraq tóselíp, 10 myń sharshy metr aumaqqa kógal egíledí. Jol jıegínde tabıǵı jasyl qorǵanys beldeuín qalyptastyru úshín 18 myń kópjyldyq būta egílmek. Ósímdíkterdíń jaqsy jersínuín qamtamasyz etu maqsatynda avtomatty jáne tamshylatyp suaru júıesín de ornatqaly otyr.
Jayau júrgínshíler ınfraqūrylymy ornalasqan 0,7 gektar aumaq tolyq jańǵyrtylady. Mūnda tozuǵa tózímdí 6 325 sharshy metr tas pen 750 sharshy metr asfalt tóseledí. Qoǵamdyq keńístíktíń tazalyǵyn saqtau úshín 20 jańa qoqys jáshígí de ornatylady. Sonymen qatar keshkí uaqytta qauípsízdíktí arttyruǵa erekshe nazar audarylyp, 2,1 shaqyrym kabel jelísí tartylyp, osy zamanǵy 106 jaryqtandyru baǵanasy ornatylady.
«Būl joba eń aldymen jayau júrgínshílerdíń qauípsízdígín qamtamasyz etuge baǵyttalǵan. Panfılov kóshesíníń tómengí bólígí – adam kóp júretín mańyzdy audan. Míndetímíz ony jaryq, taza árí jaıly etu. Bíz tek tas tósep jatqan joqpyz. Suaru máselesín sheshíp, qosymsha jaryqtandyru ornatyp, jol boıynda jasyl qorǵanys beldeuín qosa qalyptastyryp jatyrmyz. Qala ortalyǵy men shet aımaq dep bólmeı, barlyq jerde tūrǵyndarǵa bírdeı qolaıly orta qalyptastyruymyz kerek», – dedí audan ákímí Arman Shamshın.