Búgín Nauryznama onkúndígíníń úshínshí kúní — Mádenıet jáne ūlttyq salt-dástúr kúníne oraı Almatyny bı dumany kernedí, – dep habarlaıdy aqshamnews.kz tílshísí.
Megapolıstegí jetekshí teatrlardyń artısterí kóktemníń jańaruyn aıshyqtaıtyn merekemen qala tūrǵyndaryn qūttyqtau úshín auqymdy fleshmobqa bíríktí.
Būl úlken performanstyń bastamashysy — Natalıya Sats atyndaǵy teatr. Ís-shara Qazaqstan Respublıkasy Mádenıet jáne aqparat mınıstrlígí men Almaty qalasy ákímdígíníń resmı qoldauymen ūıymdastyryldy.
Aıta keteıík, qazírgí uaqytta qala ákímdígí atalǵan teatr ǵımaratynda auqymdy qaıta jańǵyrtu jūmystaryn júrgízíp jatyr. Būl turaly jaqynda Almaty TV telearnasyndaǵy «Arhıtektor» baǵdarlamasynyń bír shyǵarylymynda keńínen aıtylǵan bolatyn.
Jarqyn fleshmobqa sondaı-aq myna teatr ūjymdary qatysty:
- Ǵ. Músírepov atyndaǵy Qazaq memlekettík akademıyalyq balalar men jasóspírímder teatry;
- M. Lermontov atyndaǵy Memlekettík akademıyalyq orys drama teatry;
- Q. Qojamıyarov atyndaǵy Respublıkalyq memlekettík akademıyalyq ūıǵyr muzykalyq komedıya teatry;
- Respublıkalyq memlekettík akademıyalyq koreı muzykalyq komedıya teatry;
- Respublıkalyq akademıyalyq nemís drama teatry.
Túrlí shyǵarmashylyq mektepter, ártúrlí etnostar men stılder toǵysqanymen, barlyǵyn bír yrǵaq pen ortaq ruh bíríktírdí. «Qara jorǵa» bıí shekara ataulyny joıyp, búkíl qalany bírtūtas merekelík sahnaǵa aınaldyrdy. Ol dostyqtyń, ata-baba mūrasyna degen qūrmettíń jáne Almaty mádenı keńístígíníń ajyramas bírlígíníń jarqyn sımvolyna aınaldy.
Bír erekshelígí, fleshmobqa kásíbı bıshíler emes, drama teatrlarynyń akterlerí qatysty. Olar nebárí bír aptanyń íshínde dala bıíníń yrǵaǵyn sheber meńgeríp, árbír qımylyna akterlík sheberlík pen ūlttyq dástúrge degen qūrmettí daryta bíldí.
QR «Saltanat» memlekettík bı ansamblí bíregeı horeografıya ázírlep, fleshmobtyń kásíbı deńgeıde ótuíne úles qosty.
Jobanyń júzege asuyna Almaty TV teleradıokompanıyasy da erekshe úles qosty. Arna habar taratushy ǵana emes, negízgí aqparattyq seríktes árí ıdeyalyq qoldaushy retínde túsírílím jūmystaryn ūıymdastyryp, medıyalyq qoldau kórsettí. Sonyń arqasynda merekelík kóńíl kúıdí mıllıondaǵan kórermen ekran arqyly sezíne aldy.
Kele jatqan Áz-Nauryz meıramy qūtty bolsyn! Kóktem ár shańyraqqa jylu, bereke men shabyt ákelsín!