Bilim berý júıesinde arnaıy ázirlengen "Ustaz" ulttyq platformasy jappaı qoldanysqa engizildi.
Búgingi tańda bul júıege 640 myńnan astam pedagog tirkelip, ózderiniń jeke kabınetin ashqan, dep habarlaıdy aqshamnews.kz
Olardyń qataryna mektepke deıingi, jalpy orta, arnaıy, qosymsha, tehnıkalyq jáne kásiptik bilim berý uıymdarynyń ustazdary kiredi.
Qazirdiń ózinde 95 myńnan astam muǵalim kásibı biliktiligin rastaýdy bastap ketti. Sonymen qatar 40 myńǵa jýyq pedagogtyń ótinishi boıynsha sheshim qabyldanyp, olardyń biliktilik deńgeıi anyqtalǵan.
Platformanyń basty artyqshylyǵy – baǵalaý prosesiniń ádildigi men ashyqtyǵy. Muǵalimniń biliktilik deńgeıi tek komısıanyń sheshimimen ǵana emes, avtomattandyrylǵan júıe arqyly anyqtalady. Bul tásil adam faktoryn azaıtyp, ádil baǵalaýǵa múmkindik beredi.
Sala mamandarynyń aıtýynsha, onlaın atestattaý muǵalimderdi úzdiksiz damý men ózin-ózi jetildirýge yntalandyrady. Biliktiligin dáleldegen ustazdar laıyqty deńgeı men qosymsha yntalandyrýǵa ıe bolady.