Qasym-Jomart Toqaev memleket jáne qoǵam qaıratkerí Ravıl Shyrdabaevqa «Otan» ordenín, Qazaqstannyń eńbek síńírgen qaıratkerí Serík Toqpanovqa I dárejelí «Barys» ordenín saltanatty túrde tabystady, dep habarlaıdy aqshamnews.kz Aqordaǵa sílteme jasap.
"Ásírese, mūnaı-gaz salasyn órkendetuge mol eńbek síńírdíńíz. Sízdíń bastamańyzben būl sala jańa kezeńge qadam basty deuge bolady. Mınıstr, oblys ákímí, deputat retínde ūlt múddesíne adal qyzmet ettíńíz. Dıplomatıya salasynda jūmys ístep, elímízdíń halyqaralyq bedelín nyǵaıtuǵa atsalystyńyz. Sondaı-aq síz – mūnaı óndírísíne arnalǵan bírneshe ǵylymı eńbektíń avtorysyz. Halqymyz «Eńbegímen er syıly» degen. Sízdíń eren eńbegíńíz – óskeleń buyn úshín úlgí-ónege", – dedí Memleket basshysy.
Sonymen qatar Prezıdent bílíktí dáríger, «altyn qoldy hırurg» retínde Serík Toqpanovtyń sanaly ǵūmyryn ūlt saulyǵy úshín eńbek etuge arnaǵanyna toqtaldy.
"Densaulyq saqtau júıesínde elu jyldan astam uaqyt boıy qyzmet etíp kelesíz. Dáríger bolu – mamandyqqa adal bolu degen sóz. Būl – júgí auyr, kúrdelí jūmys. Síz eńbek jolyńyzda asa kúrdelí otalar jasap, myńdaǵan adamnyń ómírín saqtap qaldyńyz. Naǵyz janashyr dáríger boldyńyz. Qazaqstannyń medıtsına ǵylymyn damytuǵa orasan zor úles qostyńyz. Sízderge beríletín búgíngí joǵary memlekettík marapat – el ıgílígí úshín jasalǵan tabandy eńbektíń laıyqty jemísí. Būl – jūrtymyzdyń shynaıy yqylasy jáne zor alǵysy", – dedí Qasym-Jomart Toqaev.
Ravıl Shyrdabaev pen Serík Toqpanov joǵary memlekettík marapattarǵa laıyq kórgení úshín Prezıdentke alǵys aıtty.