«Qazaq tílí» qoǵamy – memlekettík tíldíń myzǵymas tūǵyryn nyǵaıtyp júrgen asa mańyzdy qūrylym, dep habarlaıdy aqshamnews.kz tílshísí.
Memleket basshysy Qasym-Jomart Toqaev Halyqaralyq «Qazaq tílí» qoǵamynyń H qūryltaıynda sóz sóıledí.
«Barshańyzben bírge Halyqaralyq «Qazaq tílí» qoǵamynyń H qūryltaıynda bas qosyp otyrǵanymyzǵa rızamyn. Búgíngí jıynnyń mán-maǵynasy erekshe. Sebebí Ana tílí máselesí, būl – memlekettík, sayası jáne ūlttyq mańyzy bar taqyryp. Qazírgí tańda dúnıe júzínde tíl ózektí, názík máselege aınalyp kettí. Būl úrdíske bárímíz kuá bolyp otyrmyz. Eń aldymen, osy jerde sóz sóılep, mazmūndy oılaryn ortaǵa salǵan azamattarǵa alǵysymdy bíldíremín. Salmaqty píkírler, ūtymdy ūsynystar aıtyldy. Sonyń bárín mūqıyat qarap, aldaǵy jūmysymyzda míndettí túrde eskeru qajet», – dedí Prezıdent.
Qasym-Jomart Toqaev «Qazaq tílí» qoǵamynyń memlekettík tíldíń myzǵymas tūǵyryn nyǵaıtyp júrgen asa mańyzdy qūrylym ekenín atap aıtty.
«Sonau 1989 jyly írgesí qalanǵan ūıymnyń Egemen el tarıhyndaǵy orny bólek. Kezínde kórnektí ǵalymdar – akademıkter Ábduálı Qaıdar jáne Ómírzaq Aıtbaıūlynyń bastamasymen qūrylǵan «Qazaq tílí» qoǵamynyń tarıhı jolyn qazírgí buyn ókílderí men belgílí tíl mamandary laıyqty jalǵastyryp kele jatyr. Búgínde ūıym múshelerí kóptegen tıímdí ís-sharalardy, jasampaz jobalardy tabysty júzege asyruda. Men Memleket basshysy retínde «Qazaq tílí» qoǵamynyń ár múshesíne shynaıy rızashylyǵymdy bíldíremín. Zańǵar jazushy Ábísh Kekílbaevtyń «Tíl mereıí – el mereıí» degen qysqa-nūsqa, maǵynasy tereń sózí bar. Tíl – barshamyzǵa ortaq qūndylyq. Tíl – Allanyń qūdíretíníń arqasynda adamdarǵa berílgen úlken syı árí múmkíndík. Tíl – adamzattyń negízgí jetístígí. Adam balasynyń oıdaǵydaı damuynyń eń basty sebebí de – tíl. Bíz órkenıettí el retínde ana tílímíz – qazaq tílíníń abyroı-bedelín arttyru úshín bír el bolyp tabandy jūmys ísteuímíz kerek. Búgíngí jıynnyń basty maqsat-míndetí de – osy», – dep atap kórsettí.