Bıyl mausymda aua temperaturasy 43 jyl būrynǵy rekordty jańartty. Qazgıdromet el aumaǵynyń basym bólígínde aua temperaturasynyń ortasha mání klımattyq normadan 1–3,5 gradusqa joǵary bolǵanyn aıtty, - dep habarlaıdy Massaget.kz tílshísí.
Eldegí temperaturalyq fonnyń joǵary boluyna Batys Azıyadan jyly aua massalarynyń keluí sebep bolǵan. Mausymnyń ekínshí onkúndígí erekshe ystyq bolyp, temperaturalyq rekord tírkeldí.
Máselen, 6 mausymda Tarazda aua temperaturasy +37,4 gradusqa jetíp, 2023 jylǵy būrynǵy rekordtan (+36,0 gradus) asyp tústí. Balqashta 12 mausymda +34 gradus tírkeldí, būl 1982 jylǵy +32,5 gradus rekordynan joǵary.
16–19 mausym aralyǵynda myna qalalarda rekordtar jańardy:
- 16 mausym, Jezqazǵan – +38,4 gradus (1988 jylǵy rekord – +38,3 gradus)
- 17 mausym, Shymkent – +38,7 gradus (2023 jylǵy – +37,5 gradus)
- 18 mausym:
- - Jezqazǵan – +42,4 gradus (1988 jylǵy – +41,1 gradus)
- Shymkent – +40,6 gradus (2023 jylǵy – +39,1 gradus)
- Túrkístan – +42,8 gradus (1988 jylǵy – +42,6 gradus)
- Almaty – +35,7 gradus (2005 jylǵy – +35,0 gradus)
- 19 mausym, Semeı – +38,1 gradus (2023 jylǵy – +37,2 gradus)
Keıín 24 mausymda Shymkentte +39,4 gradus tírkelíp, 1984 jylǵy +39,2 gradus rekordynan asty. 29 mausymda Almatyda temperatura +36,6 gradusqa jetíp, 2022 jylǵy +35,5 gradus rekordyn jańartty.
Astanada mausymdaǵy ortasha temperatura +21,4 gradus boldy (norma +19,6 gradus). Eń joǵary temperatura 18 mausymda – +36,3 gradus, al eń tómení 9 mausymda – +9,4 gradus tírkeldí.
Jalpy jyly aua raıyna qaramastan, keı óńírlerde temperatura aıyrmashylyqtary baıqaldy. Qazaqstannyń batys bólígínde, ásírese Mańǵystau oblysynda, temperaturalyq rejım negízínen normaǵa saı nemese odan 1–1,7 gradus tómen boldy.