Mańǵystaýda kámeletke tolmaǵan balaǵa qatysty jynystyq sıpattaǵy qylmys jasady degen kúdikpen jergilikti vıdeograf ustaldy, - dep habarlaıdy Aqshamnews.kz tilshisi.
Áleýmettik jelidn belgili laqap atpen jumys isteıtin, jergilikti pablıkter men Aqtaý ákimdigine vıdeorolık túsirip júrgen operatordyń birneshe apta buryn akkaýnttary joǵalyp ketkeni týraly jazbalar paıda boldy. Jarıalanymdardyń birinde onyń tanysy vıdeograf kámeletke tolmaǵandarǵa qatysty jynystyq sıpattaǵy áreketter boıynsha jazylǵan aryzdan keıin qamaýǵa alynǵanyn aıtqan. Atalǵan balalar odan vıdeo túsirýdi úırenip júrgeni atap ótilgen.
Polısıa bul derekti rastady. 4 qarashada quqyq qorǵaý organdaryna kámeletke tolmaǵanǵa qatysty jynystyq sıpattaǵy áreket jasalǵany týraly aryz túsken. Aryz boıynsha QR QK-niń 121-baby 4-bóligi boıynsha qylmystyq is qozǵaldy. Kúdikti anyqtalyp, ustalǵan, sottyń sanksıasymen eki aıǵa ýaqytsha tergeý ızolátoryna qamalǵan.
«Polısıa barlyq tergeý jáne is júrgizý sharalaryn tolyq kólemde júrgizip jatyr. Oqıǵanyń mán-jaıy anyqtalyp jatyr, aryzdaǵy derekter tekserilip, qajetti saraptamalar taǵaıyndaldy», – dep habarlady vedomstvo.
Polısıa málimetinshe, jábirlenýshi 13 jasta, al kúdiktiniń jasy 29-da. Áleýmettik jelilerdegi aqparatqa qaraǵanda, ol dron arqyly vıdeorolıkter túsirip kelgen.