Konstıtutsıyalyq reforma jóníndegí komıssıyanyń úshínshí otyrysynda Májílís deputaty Maksım Rojın Ata Zańǵa engízíletín bírqatar ózgerístí qoldaıtynyn bíldírdí. Ol Halyq keńesín qūru men Vıtse-prezıdent ınstıtutyn engízu qoǵamdyq dıalogtí kúsheıtíp, eldegí basqaru sapasyn arttyruǵa baǵyttalǵanyn atap óttí.
Maksım Rojınníń aıtuynsha qoldanystaǵy qoǵamdyq dıalog alańdary keı jaǵdaıda tūtas jalpyūlttyq múddení qamtamasyz ete almaı otyr. Osyǵan baılanysty Konstıtutsıyada Halyq keńesín bekítu - obektıvtí qajettílík dep esepteıdí. Onyń píkírínshe, būl qūrylym azamattardyń zań shyǵaru úderísíne júıelí árí tíkeleı qatysuyna múmkíndík beredí.
Osy tūrǵyda Maksım Rojın Halyq keńesíne zań jobalary, íshkí sayasat jáne referendum ótkízu máselelerí boıynsha ūsynys jasau qūqyǵyn beru ūlttyq jáne álemdík tájírıbede tıímdílígín dáleldegen ozyq model ekenín atap óttí. Onyń aıtuynsha, mūndaı tetík qoǵamnyń belsendí azamattaryna zań shyǵaru protsesíne naqty qatysuǵa múmkíndík beretínín aıtty.
«Búgíngí qoǵam - belsendí jáne talapshyl. Endí shashyrandy dıalog alańdary, túrlí qoǵamdyq platformalar keı jaǵdaıda tūtas jalpyūlttyq múdde men talqylaudy qamtamasyz ete almaıdy. Sondyqtan ūsynylǵan Halyq keńesí - formaldí jańalyq emes, obektıvtí qajettílík», - dedí Maksım Rojın.
Sonymen qatar ol Halyq keńesíníń qūramyna etnostardyń, óńírlerdíń jáne qoǵamdyq ūıymdardyń ókílderí enetínín atap óttí. Būl keńestí memleket pen qoǵam arasyndaǵy altyn kópírge aınaldyryp, ūlttyq bírlíktí naqty íspen qamtamasyz etuge jol ashady.
Bayandamasynda Maksım Rojın bılík tarmaqtarynyń jauapkershílígín kúsheıtuge baǵyttalǵan túzetulerge de toqtaldy. Ūsynylǵan ózgeríster «Kúshtí Prezıdent - Yqpaldy Parlament - Esep beretín Úkímet» qaǵıdatyn naqty mazmūnmen tolyqtyrady.
Qorytyndylaı kele, deputat ūsynylyp otyrǵan konstıtutsıyalyq túzetuler memlekettílíktí evolyutsıyalyq jolmen kúsheıtetínín aıtty jáne komıssıya múshelerín būl bastamalardy qoldauǵa shaqyrdy.