Aqshamnews.kz redaksıasy "Kún sany" aıdarynda aptanyń eń mańyzdy derekterine sholý jasady.
Bıyl 4,1 mıllıon oqýshy mektepke barady
Qazir elimizde 8 myńnan asa mektep jumys isteıdi. 1 qyrkúıekte mektepke 4,1 mıllıon oqýshy barady, onyń ishinde 341 myńy - birinshi synypqa qabyldanǵan oqýshylar, 232 myńy - 11-synyp oqıtyndar.
Day of AI kýrsy iske qosylady
Jańa oqý jylynan bastap bilim berý úderisine JI elementteri kezeń-kezeńimen engiziledi. Atap aıtqanda, 2025-2026 oqý jylynda JI ıntegrasıasy "Sıfrlyq saýattylyq" jáne "Informatıka" pánderinen bastalady. Bul baǵytta orta bilim berý júıesinde jasandy ıntellektti qoldanýdyń etıkalyq standarttary bekitildi. Oqýshylar úshin Day of AI onlaın kýrstary, al pedagogtar úshin úsh deńgeıli biliktilikti arttyrý kýrstary daıyndaldy.
Bıyl 93 myńnan asa stýdent grant aldy
Úkimet otyrysynda ǵylym jáne joǵary bilim mınıstri Saıasat Nurbek bıyl Ulttyq biryńǵaı testileý (UBT) 16 mamyrdan 10 shildege deıin 46 óńirlik testileý ortalyqtarynyń bazasynda ótkizilgenin habarlady. Oǵan 210,2 myńnan astam talapker qatysty, olardyń 76,35%-y (160,5 myń adam) shekti kórsetkishinen asyra bal jınady. UBT-nyń ortasha nátıjesi 69,42 bal boldy.
"2025 jyly memlekettik bilim granttarynyń konkýrsyna 113 myńǵa jýyq ótinim berildi, bul ótken jylmen salystyrǵanda 9 myńǵa artyq. Bıyl joǵary jáne joǵary oqý ornynan keıingi bilimi bar kadrlardy daıarlaýǵa 93 232 grant bólindi, onyń ishinde 77 084 grant joǵary bilim alýy úshin bólindi. Konkýrs qorytyndysy boıynsha granttar 99% kóleminde ıgerildi", — dedi mınıstr.
Prezıdent tapsyrmasy boıynsha bıyl 29 jataqhana salý josparlanǵan
Memleket basshysynyń stýdentterdi baspanamen qamtý jónindegi tapsyrmasyn júzege asyrý sheńberinde 2025 jyly 10 439 oryndyq 29 jataqhanany iske qosý josparlanǵan. Bul týraly Úkimet otyrysynda ǵylym jáne joǵary bilim mınıstri Saıasat Nurbek habarlady. Olardyń ishinde JOO stýdentterine 8 325 oryndyq 20 jataqhana, kolej stýdentterine 2 114 oryndyq 9 jataqhana arnalǵan.
Búgingi tańda 3 528 oryndyq 4 jataqhana paıdalanýǵa berildi. Olar – Túrkistan qalasynda 652 oryndyq 2 jataqhana, Astana qalasynda 2 876 oryndyq 2 jataqhana.
Oqý jylynyń basyna deıin 4 228 oryndyq 19 jataqhana ashylady dep kútilýde. Olar – Astana, Almaty, Shymkent qalalary, Abaı, Almaty, Aqmola, Qostanaı, Almaty, Jambyl, Túrkistan oblystary.
Odan bólek, 2025 jyldyń sońyna deıin 2 683 oryndyq 6 jataqhana iske qosylmaq. Onyń ishinde 5 jataqhana Almaty qalasynda jáne 1 jataqhana Astana qalasynda.
Bıyl 7 aıda Qazaqstannyń JİÓ ósimi 6,3% boldy
Ulttyq statısıka búrosynyń aldyn ala derekterine sáıkes, 2025 jyldyń qańtar–shilde aılarynda Qazaqstannyń jalpy ishki ónimi (JİÓ) byltyrǵy sáıkes kezeńmen salystyrǵanda 6,3%-ǵa ósken.
Taýar óndirý kólemi 8,3%-ǵa, qyzmetter 5,2%-ǵa (bul rette eń qarqyndy segment kólik pen saýda bolyp otyr), ónerkásip 6,9%-ǵa artty.
JİÓ-niń ósýine eń kóp úles qosqan salalar: kólik jáne qoıma – 22,5%, qurylys – 18,5%, kóterme jáne bólshek saýda – 8,6%, taý-ken ónerkásibi – 8,5%, óńdeý ónerkásibi – 6,1%.