Qyrǵyzstanda júrgizýshi kýáligin alý tártibi men oqý merzimi ózgerdi, dep habarlaıdy, Aqshamnews.kz tilshisi.
Prezıdent isteri basqarmasynyń málimetine sáıkes, 2026 jyldan bastap eldegi barlyq jekemenshik avtomektepter tolyqtaı memlekettik baqylaýǵa ótedi. Bul sheshim sybaılas jemqorlyqtyń aldyn alý maqsatynda qabyldanǵan. Endi B sanaty boıynsha júrgizýshiler 10 aı (480 saǵat), al C sanaty boıynsha 12 aı oqıdy.
Oqý baǵdarlamasyna jol qozǵalysy erejeleri, avtokólik qurylymy men tehnıkalyq qyzmet kórsetý, jol-kólik oqıǵasy kezindegi alǵashqy medısınalyq kómek, qaýipsiz júrgizý negizderi, quqyqtyq jáne psıhofızıologıalyq daıyndyq, sondaı-aq júrgizýshi ádebi engizilgen.
Emtıhan suraqtarynyń sany 750-den 2000-ǵa deıin artty. Teorıalyq emtıhandy jasandy ıntellekt qabyldaıdy.
Júrgizýshi kýrstaryna onlaın ótinim «Týndýk» platformasy arqyly qabyldanady. Oqý quny, ótinim berý tártibi jáne avtomektepter tizimi kelesi aptada jarıalanbaq.
Sonymen qatar, Qyrǵyzstanda 2026 jyldyń 15 qańtary men 15 aqpany aralyǵynda eski nemese merzimsiz júrgizýshi kýálikterin 10 jylǵa jaramdy jańa kýálikke tegin aýystyrý naýqany ótedi.
Aıta keteıik, buǵan deıin elde 2027 jyldyń 31 jeltoqsanyna deıin avtomektepterge lısenzıa berýge moratorıı engizilgeni habarlanǵan.