Almatyda gaz jáne órt qauípsízdígí máselelerí boıynsha auqymdy túsíndíru jūmystary jalǵasuda. Būl bastamaǵa qūtqarushylarmen bírge mádenıet pen sport salasynyń tanymal ókílderí qatysuda. Qalalyq Tótenshe jaǵdaılar departamentímen bírlesíp júzege asyrylyp jatqan aktsıyanyń maqsaty – kómírqyshqyl gazynan ulanuǵa baılanysty qaıǵyly jaǵdaılardyń aldyn alu.
Almatylyqtarǵa kezektí beıneúndeudí ánshí, aktrısa jáne telejúrgízushí Dılnaz Ahmadıeva men artıst Bírjan Hasanǵalıev joldady. Olar jeke úlgí kórsetíp, qarapaıym árí túsíníktí format arqyly ómírdí saqtap qaluǵa kómektesetín qauípsízdík erejelerín eske saldy.
«Ózíńnen basta» chellendjí ayasynda aktsıya qatysushylary kómírqyshqyl gazyn anyqtaıtyn datchıkter men tabıǵı gazdyń taraluyna áser etetín gazanalızatorlardyń jūmysyn kórsettí. Qūtqarushylardyń aıtuynsha, mūndaı qūrylǵylar qauíptí der kezínde baıqap, qaıǵyly saldardyń aldyn aluǵa múmkíndík beredí.
TJD málímetínshe, kómírqyshqyl gazynyń basty qaupí – onyń túsí de, ıísí de joq. Ol bólme íshínde kózge kórínbeı jınalyp, sanauly mınuttar íshínde auyr ulanuǵa nemese adam ólímíne ákeluí múmkín. Mūndaı jaǵdaılar kóbíne gaz jabdyqtarynyń aqaulyǵynan, gaz qūbyrlary qosylystarynyń germetıkalyǵynyń būzyluynan, jeldetu arnalarynyń jabylyp qaluynan, sondaı-aq tūrǵyn úılerdí jylytu úshín gaz plıtalary men konforkalardy paıdalanudan tuyndaıdy. Būl ásírese jeke tūrǵyn úılerde jıí kezdesedí.
Aktsıyaǵa úsh dúrkín álem chempıony, jauyngerlík sambodan álem kubogynyń ıegerí jáne brazılıyalyq djıu-djıtsudan Azıyanyń ekí dúrkín chempıony Arman Ospanov ta qosyldy. Ol qazaqstandyqtardy úıler men páterlerge gaz datchıkterín ornatuǵa shaqyryp, mūndaı qarapaıym qūrylǵylar ólímge ákeletín ulanudyń aldyn alatynyn atap óttí.
Bastamany mádenıet pen óner salasyndaǵy ózge de tanymal tūlǵalar qoldady. Olar almatylyqtarǵa gaz jabdyqtarynyń jaǵdaıyn tūraqty túrde tekseríp otyrudyń, jeldetu júıesíníń dūrys jūmys ísteuín qadaǵalaudyń jáne órt qauípsízdígíníń qarapaıym talaptaryn saqtaudyń mańyzdylyǵyn eske saldy. Olardyń aıtuynsha, qauípsízdíkke jauapkershílíkpen qarau – óz ómíríńe ǵana emes, jaqyndaryńnyń ómíríne de jasalǵan qamqorlyq.