Jansaıa Ábdimálikti Qazaqstan shahmat federasıasy «Dara» ordenimen marapattady.
Qazaqstan shahmat federasıasynyń prezıdenti, Indýstrıa jáne ınfraqurylymdyq damý mınıstri Beıbit Atamqulov búgin ataqty qazaqstandyq grosmeıster Jansaıa Ábdimálikpen kezdesip, ony kásibı jetistigimen jeke quttyqtap, shahmat federasıasynyń eń joǵary nagradalarynyń biri – «Dara» ordenin tapsyrdy, dep habarlady Almaty-akshamy.kz.
Esterińizge sala keteıik, Gıbraltardaǵy áıelder arasyndaǵy shahmattan Gran-prı kezeńindegi oıynynyń qorytyndysy boıynsha Jansaıa Ábdimálik tarıhı jetistiktiń avtory boldy. Birde-bir oıynda jeńilmegen shahmatshy mártebeli jarysta merziminen buryn jeńiske jetip qana qoımaı, sonymen qatar halyqaralyq grosmeıster ataǵyn alǵan alǵashqy qazaqstandyq, sondaı-aq Ortalyq Azıa ókili boldy.
Beıbit Atamqulov sportshyny jetistigimen shyn júrekten quttyqtap, elimizdiń sport jetistikteri qazynasyna qosqan úlesi úshin alǵys bildirdi. Sondaı-aq, shahmatshyǵa jańa jetistikter tiledi.
Anyqtama úshin:
Jansaıa Ábdimálik – qazaqstandyq shahmatshy, halyqaralyq grosmeıster.
Óziniń alǵashqy ataǵyn Jansaıa Ábdimálik alty jasynda, 2006 jyly Almaty qalasynyń chempıonatynda 8 jasqa deıingi qyzdar arasynda jeńip alǵan.
Halyqaralyq shahmat federasıasynyń (FIDE) erejelerine sáıkes, erler arasyndaǵy halyqaralyq grosmeıster (HG) ataǵyna qol jetkizý úshin HG úsh normasyn oryndaý qajet jáne ELO FIDE reıtıńisinde 2500 upaıdan kóp jınaý kerek.
HG alǵashqy normasyn Jansaıa Ábdimálik World Open 2017 (Fıladelfıa, SSHA) iri halyqaralyq týrnırinde oryndaǵan. 216 shahmatshy, onyń qatarynda 33 grosmeıster jáne 26 halyqaralyq sheber qatysqan dodada ol ekinshi orynǵa ıe boldy. Al 2018 jyldyń naýryzynda ol HG ekinshi normasyn oryndady. 150 shahmatshy qatysqan Karpos Open-2018 v Skope (Makedonıa) týrnırinde Jansaıa besinshi oryndy qanjyǵasyna baılady. Dál sol jyly sáýirde qazaqstandyq boıjetken Budapest Spring Festival 2018 (Vengrıa) halyqaralyq týrnırinde úshinshi normany oryndaıdy.
2021 jyly maýsymda Jansaıa Ábdimálik Gıbraltarda ótken FIDE áıelder Gran-prıiniń sońǵy kezeńinde jeńiske jetti. Ol birde bir oıynda jeńilis tappaı, 11 upaıdyń 8½ jınady. Osylaısha Jansaıa Ábdimálik 2500 pýnktten asatyn, kópten kútken reıtıńke qol jetkizip, erler grosmeısteri ataǵyna ıe boldy.