Jańa jyl — árdaıym úmít pen ízgí nıetke toly erekshe kezeń. Būl uaqytta júrekterde ǵajaıypqa degen sením oyanyp, shynaıy tílekterdíń oryndaluyna jol ashylady. Osyndaı sıqyrly sátterde jasalǵan árbír ıgí ís aıryqsha mańyzǵa ıe. Sol ízgí bastamalardyń jalǵasy retínde bıyl jańa jyldyq quanysh QR ÍÍM Ūlttyq ūlanynyń áskerı bólímderíne de jettí.
Jańa jyl qarsańynda Ūlttyq ūlannyń Bas qolbasshysy general-maıor Ańsaǵan Baltabekov merzímdí áskerı qyzmetín ótep júrgen sarbazdardyń bes bírdeı asyl armandaryn oryndady. Eshqandaı oryndalar degen úmít pen esepsíz aıtylǵan tílekter kútpegen jerden shyndyqqa aınaldy. Būl — Jańa jyl qarsańyndaǵy ízgí nıettíń aıqyn kórínísí.
Ásker qatarynda arnaıy saualnama júrgízílíp, sarbazdar óz tílekterín búkpesíz, ashyq jetkízdí. Olar qyzmet barysynda armandarynyń oryndalatynyn kútpegen edí. Alaıda jańa jyl jaqyndaǵan saıyn, típtí eń qarapaıym tílekterdíń ózí oryndauly múmkín ekení taǵy bír márte dáleldendí.
Máselen, Taraz qalasyndaǵy 5513 áskerı bólímíníń áskerı qyzmetshísí Aleksandr Mıroshın būryn-sońdy ūshaqqa míníp kórmegenín jáne kókke kóteríludí armandaıtynyn jazǵan. Onyń būl tílegí Ūlttyq ūlan Bas qolbasshysynyń qoldauymen oryndaldy. Ūshudyń alǵashqy sátterínen-aq sarbazdyń quanyshy men tolquy aıqyn baıqaldy. Shynaıy baqyt, quanysh sezímí ony búkíl sapar boıy jetelep otyrdy.
Alaıda jańa jyldyq quanysh mūnymen ayaqtalǵan joq. Qonǵan sátten keıín Aleksandrdy taǵy bír tosyn syı - anasymen qauyshu kútíp tūrdy.
Sarbazdyń anasy Natalya Mıroshına būl kúní tek ūlynyń ǵana emes, ózíníń de armany oryndalǵanyn jetkízdí. Sebebí áskerdegí balasymen júzdesu — jańa jylda kóp otbasylar ańsaıtyn eń qymbat syı.
Al Almaty qalasyndaǵy 5571 áskerı bólímíníń áskerı qyzmetshísí Raıymbek Baqytbek shokolad ónímderíníń qalaı daıyndalatynyn kórgísí keletínín jetkízgen. Bas qolbasshynyń jańa jyldyq tartuy retínde oǵan elímízdegí tanymal «Rahat» kondıterlík fabrıkasyna ekskursıya ūıymdastyryldy. Sarbaz táttí ónímderdíń óndírís tehnologıyasymen tanysyp, Qazaqstannyń tanymal brendíne aınalǵan fabrıkanyń jūmysyn óz kózímen kórdí.
Alatau qalasyndaǵy 6654 áskerı bólímínde qyzmet etetín Dastan Nūrlan Jańa jyl qarsańynda búkíl rotasyna merekelík kóńíl kúı syılaudy armandap, bír jáshík mandarın tíledí. Ūlttyq ūlan Bas qolbasshysynan kelgen sálemdemení ol ózíne ǵana qaldyrmaı, qarulas dostarymen bólísíp, bólímshege ortaq quanysh syılady.
Óskemen qalasyndaǵy 5518 áskerı bólímíníń qatardaǵy jauyngerí Elerbek Sūltanqūlov suret saluǵa degen qyzyǵushylyǵyn qaıta jandandyrǵysy keletínín aıtqan. Onyń tílegí kútpegen árí áserlí sátte oryndaldy. Shyǵarmashylyqqa arnalǵan qūral-jabdyqtar keshkí tekserís kezínde tabystaldy. Būl sarbaz úshín erekshe este qalarlyq sát boldy.
Osy áskerı bólímde qyzmet etetín qatardaǵy jauynger Júnís Qarabaevtyń tílegí de kópshílíktíń júregín eljírettí. Ol otbasynyń suretí beınelengen shynyayaq armandaǵan. General-maıor Ańsaǵan Baltabekov tabystaǵan būl syı sarbaz úshín tuǵan úıín, jaqyndaryn jáne alysta júrse de sezíletín jylulyqty eske salatyn qymbat belgíge aınaldy.
Aıta ketu kerek, Qazaqstan Respublıkasy ÍÍM Ūlttyq ūlanynda merzímdí áskerı qyzmetshílerdíń materıaldyq qamtamasyz etíluímen qatar, olardyń moraldyq-psıhologıyalyq jaǵdaıyna da erekshe kóńíl bólínedí. Árbír sarbazǵa degen qamqorlyq — qyzmettíń mańyzdy qūramdas bólígí.
Jańa jyl qarsańynda oryndalǵan tílekter sarbazdar úshín qūqyqtyq tártíp áskerleríndegí qyzmettíń jarqyn árí jyly estelígíne aınalatyny sózsíz. Osyndaı sátterde qolbasshylyq tarapynan kórsetílgen qoldau men janashyrlyqtyń mańyzy arta túsíp, áskerı qyzmetshílerge degen qamqorlyqtyń árdaıym basty nazarda ekenín aıqyn kórsetedí.