Jyl bastalǵanda kóp adam odan úlken úmít kútedí. Bíreuler úshín būl ómírdí "taza paraqtan" bastauǵa múmkíndík bolsa, endí bíreuler úshín ótkenge kóz júgírtíp, aldaǵy baǵytty aıqyndaudyń sátí. Osy tūsta keı adamdar jyl saıyn ózíne esep beríp, jetken jetístíkterín saralap, kelesí jylǵa naqty maqsattar qoıyp, arnaıy uaqyt bóledí. Olar úshín jyldyq jospar - jaı ǵana tízím emes, ómírín júıeleudíń bír joly.
Alaıda jańa jyl bastalyp ketse de, ótken jyldy qorytyndylamaǵan, aldaǵy jylǵa eshqandaı jospar qūrmaǵan, típtí mūny ádetke aınaldyrmaǵan adamdar da az emes. Keıbírí maqsat qoyudy artyq jūmys sanaıdy, endí bírí "bárí óz retímen bolady" degen ūstanymdy jón kóredí.
Sonda bír jylǵa maqsat qoyu rasymen qajet pe? Bír jylǵa jospar jazu qanshalyqty "jūmys ísteıdí"? Mūnyń syryn Aqshamnews.kz tílshísí zerttep kórdí.
Keı adamdar (típtí keıbír bıznes ókílderí de) úshín maqsat qoyu - bos áureshílík, uaqytty tekke ketíru sıyaqty kórínuí múmkín. Olardyń oıynsha, jospar kóp oılanuǵa ıtermelep, naqty áreketke kedergí jasaıdy. Mūndaı adamdar kóbíne tek syrtqy qysym bolǵanda ǵana maqsat oılap tabady. Bíraq būl ómírdí jaqsartuǵa degen íshkí qajettílíkten emes.
Degenmen shyn mánínde, maqsatsyz ósu bolmaıdy. Adam balasynyń ómírínde eshteńení ózgertkísí kelmeıtín, jaqsartuǵa ūmtylmaıtyn kezeńí múlde bolmaıdy desek, qatelespeımíz.
Sondyqtan jauap qarapaıym: maqsat qoyu - míndettí emes.
Bíraq eger ómírdí jaqsy jaqqa ózgertkíń kelse, damyǵyń kelse, ózíńdí jańa deńgeıde kórgíń kelse, onsyz taǵy bolmaıdy. Eń bastysy, maqsatty jaı ǵana armandap qoımaı, ony naqty árí sanaly túrde tūjyrymdau qajet.
Osy maqalada bíz ótken jyldy qalaı dūrys qorytyndylau keregín, jańa jylǵa maqsatty qalaı tańdap, oǵan jetu jolyn qalaı josparlauǵa bolatynyn qarastyramyz.
Ótken jyldy qalaı qorytyp, baǵalau kerek?
Jyldyq josparlaudy ótken jyldy saralaudan bastaǵan dūrys. Būl mekteptegí "Men būl jyldy qalaı ótkízdím?" degen shyǵarmaǵa ūqsaıdy. Ol úshín būl íste tájírıbesí bar mamandar ekí qarapaıym jattyǵudy ūsynady
1-jattyǵu: úsh sūraqqa jauap beru
- 2025 jylǵy eń jarqyn jetístígím nemese oqıǵam qandaı boldy?
- Není ísteu eń qıyn boldy, alǵa qoıǵan maqsattyń qaısysy júzege aspady?
- 2026 jylǵa není alyp ótkím keledí, al není 2025 jyly qaldyrǵym keledí?
Alǵashqy sūraqqa úlken jetístíkter de, ūsaq, bíraq mańyzdy ózgeríster de kíruí múmkín: sayahat, qyzmettegí ósu, jańa daǵdy, úı jóndeu, típtí, kópten kútken perdeníń alynuy. "Jarqyn" oqıǵa sheńberíne není jatqyzuǵa bolatynyn maqsaty men josparyn jazushy ózí tańdaıdy.
Ekínshí sūraqta qıyndyqtar men oryndalmaǵan armandarǵa toqtalǵan jón. Keıde eń jarqyn oqıǵa eń auyr synaq ta boluy múmkín - būl qalypty jaǵdaı.
Úshínshí sūraqta aldyńǵy jauaptarǵa qarap, 2026 jyly saǵan ne qajet ekenín anyqtaısyń.
2-jattyǵu: Ózíńdí maqtau
Ózíńdí maqtauǵa bolatyn 30 nárseníń tízímín jazu. Būl tapsyrmany shyn kóńílden, yqylas qoıyp jazǵan jaqsy, ūsaq-túıek dep bólme. Būl jattyǵu ońaı kóríngenímen, kóp adamǵa qıyn.
Ekí jattyǵudy da qaǵaz alyp, qalammen jazǵan dūrys. Būl emotsıyany sezínuge, ótkendí shyn mánínde túısínuge kómektesedí.
Mūndaı "audıt" 2026 jylǵa dūrys bastapqy núkte qoyu úshín qajet.
Jylǵa maqsatty qalaı tańdau kerek?
Būl jattyǵular ótken jyly sení alǵa jetelegen maqsattardy anyqtauǵa kómektesedí. Mūndaı maqsattar:
- kásíbı nemese jeke damuǵa,
- tabysqa,
- qanaǵat sezímíne,
- energıyaǵa ákeledí.
Eger 2025 jyly belgílí bír baǵytta eńbek etíp, odan kúsh alǵan bolsańyz, sol baǵytty jalǵastyruǵa bolady. Būl - 2026 jylǵa maqsat qoyudaǵy bírínshí shekara.
Ekínshí shekarada - oryndalmaǵan maqsattar tūrady. Olar ókínísh sezímín tudyruy múmkín. Būl qalypty. Ózíńe sūraq qoı:
- Būl maqsat maǵan shynymen kerek pe?
- Būl - meníń qalauym ba, álde syrttan tańylǵan ba?
- Ol maǵan būrynǵy maqsattarym sıyaqty quat bere me?
Sosyn armandaryń bárín qaıtadan "Men..... bolǵanyn qalaımyn...formatynda jazu kerek.
Qansha maqsat qoyu kerek?
Eń aldymen, adam ózíníń resursyn baǵalap alsa jón:
- uaqyt
- aqsha
- energıya
- bílím
- qoldau
Kúníne orta eseppen 2-3 saǵat qana bos uaqyt qalatynyn eskersek, jańa maqsat - eskí bír ádetten bas tartu degen sóz.
Maqsattardy ómír salalary boıynsha bólgen jón:
- densaulyq
- mansap
- qarym-qatynas
- qarjy
- shyǵarmashylyq / jeke ís
Ádette 1-2 sala "aqsap" tūrady. Solarǵa basymdyq ber.
2–3 mańyzdy maqsat - jetkílíktí.
Eń bastysy, adam ózíne kúsh-quat beretín maqsatty tańdau kerek.
Jyldyq maqsat qoyu ádísterí:
- SMART - naqty, ólshenetín, qoljetímdí, mańyzdy, merzímí bar maqsat
- HARD Goals - emotsıyaǵa áser etetín, shabyttandyratyn, kúrdelí maqsattar
- OKR - maqsat + ólshenetín nátıjeler
- Ómír dóńgelegí - ómír salalaryn teńgeru
- WOOP - qalau, nátıje, kedergí, jospar
- Kerí josparlau - sońǵy nátıjeden bastap qadamdau
- "Maqsattar aǵashy" - úlken maqsat shaǵyn áreketterden bastalady.
Qysqa qadamdardy ūzaq maqsatpen qalaı baılanystyru kerek?
Úlken maqsat míndettí túrde:
- kezeńderge (aı, toqsan)
- shaǵyn áreketterge (15-30 mınut) bólínuge tıís.
Kúndelíktí áreket myna sūraqqa jauap beruí kerek:
"Būl mení maqsatqa qalaı jaqyndatady?"
Maqsattan aınymaı júru úshín ne ísteu kerek?
- Maqsatyńdy kóz aldyńda ūsta
- Qauymdastyq nemese serík tap
- Kún saıyn az da bolsa áreket et
- Demalysty josparǵa qosudan qoryqpa
- Eger maqsat múlde shabyt bermese - odan bas tartuǵa da bolady