Maqan Esbolatov atyndaǵy İİM Almaty akademıasynda «Internet – zań keńistigi» atty kıberqaýipsizdikke baǵyttalǵan baıqaý ótip jatyr.
Sharanyń basty maqsaty – jastardyń sıfrlyq saýattylyǵyn arttyrý, kıbergıgıena máselesine nazar aýdarý jáne ınternettegi aldyn alý jumystaryn jandandyrý.
Baıqaýǵa Akademıa kýrsanttary, erikti jastar men kıbervolonterler qatysty. Jalpy sany 50-ge jýyq qatysýshy qaýipsiz sıfrlyq keńistik qalyptastyrý isine óz úlesterin qosty.
Baıqaý bes nomınasıany qamtıdy:
- «Úzdik kıbergıgıena posty» – eń kóp qaralym jınaǵan kreatıvti aqparattyq jazba;
- «Úzdik beınerolık» – keń aýdıtorıaǵa arnalǵan mazmundy beınejazba;
- «Jyldyń AntıFeıki» – memlekettik nemese qarjylyq qurylymdar atyn jamylyp jumys isteıtin jalǵan akkaýnttardy anyqtaý;
- «Kıber-kómekshi» – onlaın jáne oflaın formatta belsendi túsindirý jumystaryn júrgizgeni úshin (broshúra taratý, baıandama oqý, áleýmettik jelilerde jazba júrgizý jáne t.b.);
- «Sıfrlyq izishar» – alaıaqtyq sqemalardy taldap, ınternettegi sandyq izder arqyly tereń zertteý júrgizý.
Baıqaý Qazaqstan Respýblıkasy İshki ister mınıstrliginiń bastamasymen, Memleket basshysynyń tapsyrmasyna sáıkes júzege asyrylyp jatqan «Zań men tártip» respýblıkalyq baǵdarlamasy aıasynda uıymdastyryldy. Bul bastama – jastardyń quqyqtyq mádenıeti men sıfrlyq saýattylyǵyn arttyrýǵa baǵyttalǵan memlekettik keshendi saıasattyń bir bóligi.
Uıymdastyrýshylar baıqaý barysynda kıbervolonterlerdiń erekshe belsendilik tanytqanyn atap ótti. Olar polısıamen tyǵyz yntymaqtastyqta jumys isteıdi: feık akkaýnttardy anyqtaıdy, ınternet paıdalanýshylarǵa keńes beredi, aqparattyq naýqandar men forýmdarǵa qatysady. Búginde olardyń sıfrlyq qaýipsizdikke qosyp jatqan úlesi aıtarlyqtaı mańyzdy.
Sonymen qatar, baıqaý aıasynda kýrsanttar ondaǵan jalǵan paraqshalar men alaıaqtyq saıttardy anyqtady. Olardyń birqatary jedel buǵattaldy. Bul – jastardyń kıberkeńistiktegi naqty nátıjeli jumysyn dáleldeıtin kórsetkish.
«Sıfrlyq gıgıena – bul ár azamat úshin qajetti daǵdyǵa aınalýy tıis. Búgingi jastardyń ınternet tehnologıalaryn tereń meńgerip qana qoımaı, ony qoǵam ıgiligine paıdalanyp otyrǵanyn kórý – biz úshin úlken qýanysh. Mundaı bastamalar sanaly, sıfrlyq saýatty urpaqty qalyptastyrady», – dep atap ótti Maqan Esbolatov atyndaǵy Almaty akademıasynyń bastyǵy, polısıa polkovnıgi Qalıjan Qoblandın.