Polıtsıya 2025 jyly baılanys operatorlarymen bírlesíp, 19 mıllıonnan astam jalǵan qońyraudy būǵattady, dep habarlaıdy aqshamnews.kz
Polıtsıya málímetíne súıensek, jalpy sany 85 mıllıonnan astam alayaqtyq qońyraudyń joly kesíldí. Qylmystyq toptardy qūru jáne basqaru faktílerí boıynsha alty qylmystyq ís qozǵalsa, olardyń bíreuí transūlttyq sıpatqa ıe.
"Sonymen qatar qabyldanǵan tehnıkalyq sharalardyń nátıjesínde qylmyskerler paıdalanǵan 100 myńnan astam SIM-karta jáne 88 SIM-box qūrylǵysy tárkílendí. Ótken jyly Qazaqstannan tys jerlerde jetí call-ortalyqtyń zańsyz qyzmetí toqtatyldy. Būdan bólek, el aumaǵynda taǵy osyndaı alty ortalyqtyń qyzmetí joıyldy",- delíngen aqparatta.
Kıberqylmysqa qarsy kúres – Íshkí íster mınıstrlígíníń qyzmetíndegí basym baǵyttardyń bírí. Azamattardy tsıfrlyq keńístíkte qorǵau maqsatynda polıtsıya keshendí jūmystar júrgízude. Memlekettík organdarmen bírlesíp, mūndaı qylmystardyń aldyn alu boıynsha júıelí profılaktıkalyq sharalar atqaryluda.
"Internettíń damuyna baılanysty "dástúrlí" qylmys túrlerí onlaın-keńístíkke auysyp, olardyń jańa formalary paıda boldy. Búgínde ūrlyqtar ınternet jelísí arqyly jasalyp, qylmyskerler azamattardyń qarajatyn jymqyru úshín zamanauı tehnologıyalardy qoldanuda. Mūndaı qylmystarmen kúres úsh negízgí baǵytta júrgízíluí tıís: zańnamalyq, tehnıkalyq jáne profılaktıkalyq sharalar. Tek keshendí tásíl ǵana kıberqylmysqa óz deńgeıínde qarsy tūruǵa múmkíndík beredí".
QR ÍÍM baspasóz qyzmetí
ÍÍM qyzmetkerlerí azamattardy alayaqtardyń qūrbany bolmas úshín qarapaıym qauípsízdík erejelerín saqtauǵa shaqyrady.
"Kúmándí síltemelerge ótpeńíz, jeke derekterdí bógde adamdarǵa aıtpańyz, sondaı-aq bank kartalaryn jáne olardyń derekterín úshínshí tūlǵalarǵa bermeńíz",- dep eskerttí polıtsıya.