16 nauryz kúní «Halyq úní» táuelsíz baqylaushylar toby jańa konstıtutsıyanyń jobasyna qatysty referendumdy baqylaudyń qorytyndysyn jarıyalaǵan baspasóz konferentsıyasyn ótkízdí, – dep habarlaıdy aqshamnews.kz tílshísí.
Jurnalısterdíń aldynda sayasattanushy Nūrbolat Nyshanbaı, Nūrgeldí Ábdíǵanıūly, Dos Kóshím men qoǵam múshesí Beknūr Qysyqov sóz sóıledí.
Sarapshylardyń aıtuynsha, táuelsíz baqylaushylar tobyn qūru bastamasy jańa konstıtutsıya jobasynyń alǵashqy nūsqasy jarıyalanǵannan keıín bírden paıda bolǵan. Būl ıdeyany sayasattanushy Nūrbolat Nyshanbaı ūsynǵan, ony qoǵamdyq belsendíler men azamattyq qoǵam sarapshylary qoldapty. Toptyń negízgí míndetí — 15 nauryzda ótken dauys beru protsesíne qoǵamdyq baqylau júrgízíp, rásímníń ashyqtyǵyn qamtamasyz etu men yqtımal zańbūzushylyqtyń aldyn alu bolǵan.
Bír aı boıy daıyndyq júrgízílíp, ár qaladan eríktíler qabyldanyp, oqytu jaǵy men nūsqaulyqtar ūıymdastyryldy. Qatysushylarǵa saılau zańnamasynyń normalary men qoǵamdyq baqylau erejelerín túsíndírdí.
Referendum kúní «Halyq úní» tobynyń shamamen 2 myń baqylaushysy Qazaqstannyń 11 qalasyndaǵy uchaskede jūmys ístedí. Olardyń qatarynda Almaty, Taraz, Túrkístan, Oral, Qonaev pen Taldyqorǵan qalasy bar. Baqylaushylar uchaskelerdíń ashylǵan sátínen bastap dauys beru ayaqtalǵanǵa deıín bolyp, rásímderdíń saqtaluyn baqylap, bárín tírkep otyrdy.
Nūrbolat Nyshanbaıdyń aıtuynsha, táuelsíz baqylaushylar toptaryn qalyptastyru qoǵamdaǵy sayası mádenıettí damytyp, ınstıtutsıonaldyq senímdí nyǵaıtuǵa yqpal etedí. Endí barlyq ūsynystardy taldau úshín Ortalyq referendum komıssıyasyna joldamaq.
Sarapshy toptyń qorytyndysy jalpy alǵanda Ortalyq referendum komıssıyasy jarıyalaǵan resmı aqparatpen sáıkes shyqqanyn aıtty.
Baspasóz konferentsıyasyndaǵylar Astana, Almaty men Shymkent sıyaqty eń úlken qalalardaǵy uchaskelerde táuelsíz baqylaushylardyń boluy qoǵamdyq baqylaudyń mańyzdy elementíne aınalǵanyn aıtty. Olardyń píkírínshe, būl dauys beru rásímíníń ashyqtyǵyn qamtamasyz etíp, azamattardyń sayası nauqanǵa degen senímín arttyruǵa múmkíndík bergen.
Kezdesu sońynda top ókílderí bastamanyń negízgí maqsaty — qoǵamnyń saılau rásímíne degen senímín nyǵaıtyp, azamattyq qatysu mádenıetín damytu ekenín atap óttí. Baspasóz konferentsıyasy qoǵamdyq baqylaudyń alǵashqy qorytyndysyn shyǵaryp, mańyzdy sayası protsestíń ashyqtyǵyn qamtamasyz etudegí azamattyq qoǵamnyń rólín talqylaıtyn alańǵa aınaldy.