Túrkıya bírínshí súríndí
Europa chempıonatynda toptyq kezeń ayaqtaluǵa jaqyn. Italıya, Nıderland, Belgıya sıyaqty serke qūramalar ekínshí turdan keıín-aq pleı-off joldamasyn ıeleníp qoıǵan bolsa, úshínshí turdyń alǵashqy oıynynda Túrkıya qūramasynyń eshteńeden úmít ete almaıtyny belgílí boldy. Túríkter Shveıtsarıyadan 1:3 esebímen jeńílíp, jalǵyz ūpaı da ıelene almady. Alǵashqy ekí turda Italıyaǵa – 0:3, Uelske 0:2 esebímen ese jíbergen soń, túríkter sońǵy turda qalaıda Shveıtsarıyadan basym túsuge tıís edí. Alaıda Shenol Gúnesh jattyqtyratyn jas komanda ázírshe úlken belesten asuǵa daıyn emes sıyaqty.
Būl topta Italıya úsh kezdesuín de jeńíspen ayaqtap, endí S tobynda ekínshí oryn alǵan komandany kútíp tūr. Italıyalyqtar Euro tarıhynda toptyq turnırde óz qaqpasyna dop jíbermegen jalǵyz komanda retínde tarıhqa endí. Al Uels sońǵy turda dál osy qūramadan jeńílse de (0:1), kelesí kezeńge shyqty. Shveıtsarıya da pleı-offtan tys qalǵan joq. Būl komanda Uelsten dop aıyrmasynyń nasharlyǵynan ǵana úshínshí satyda tūr.
Avtogoldar dodasy
Būǵan deıín Euro-2016 turnırí ǵana avtogoldarǵa baı bolǵan edí. Yaǵnı bes jyl būrynǵy jarysta úsh oıynshy óz qaqpasyna dop engízíp alǵan-dy. Bıylǵy dodanyń ekínshí tury ayaqtalmaı jatyp, bes avtogol tírkeldí. Ásírese jūrt kútken Portugalıya – Germanıya kezdesuínde qorǵaushylar kóp qatelestí. 35 mınutta portugaldardyń ortalyq qorǵaushysy Ruben Dıash óz qaqpasyna dop soǵyp alsa, araǵa tórt mınut salyp Rafael Gerreıru de Germanıya paıdasyna gol soqty. Osylaısha, asa sátsíz bastalǵan kezdesu taǵdyryn «nemís mashınasy» tolyqtaı ózgerte aldy.
Būǵan deıín M.Demıral (Túrkıya) M.Hummels (Germanıya) jáne V.Shchesny (Polsha) avtogol avtory boldy.
2018 jylǵy álem chempıonatynda 12 futbolshy óz qaqpasyn tańbalap alǵan edí. Bıylǵy Eurodaǵy kórsetkísh soǵan jeteqabyl bolatyn sıyaqty.
Rekordtar, rekordtar...
- Krıshtıanu Ronaldu dop soqqan saıyn rekord jasaıdy. Portugalıya – Germanıya (2:4) kezdesuínde ol esep ashyp, Europa chempıonattarynyń fınaldyq kezeńíndegí gol sanyn 12-ge jetkízdí. Qazír oınap júrgen futbolshylar íshínde Grızmann ǵana onyń shańyna ílesíp keledí (7 dop).
- Germanıya qūramasynyń qaqpasyna engízgen doby Krıshtıanu Ronaldudyń írí turnırlerdíń fınaldyq kezeńíndegí 19-goly bolyp otyr. Būl kórsetkísh boıynsha KrıRo dańqty Mıroslav Klozemen teńestí. Kloze álem chempıonattarynda – 16, Europa bírínshílíkterínde 3 gol soqqan bolsa, Ronaldu álem chempıonattaryndaǵy 7 golyna Euro-nyń 12 dál soqqysyn qosty.
- Shveıtsarıya qūramasynyń jartylaı qorǵaushysy Jerdan Shakırı tórt bírdeı írí turnırde mergendík tanytqan alǵashqy shveıtsarıyalyq futbolshy atanyp otyr. Ol 2014 jylǵy álem chempıonatynda Gonduras qaqpasyna het-trık jasady, 2016 jylǵy Euroda Polsha qaqpasyna pleı-off kezeńínde gol engízdí, 2018 jylǵy álemdík dodada Serbıya qaqpasyna jeńís dobyn soqty. Al bıyl toptyq turnırdíń ÍÍÍ turynda Túrkıya qaqpasyna qos dop toǵytty.
- Germanıya qūramasy Europa chempıonattarynyń fınaldyq kezeńderínde 300 doptan asyra soqqan alǵashqy qūrama boldy. Nemíster Portugalıya qaqpasyn tórt ret dál kózdep, būl kórsetkíshtí 302-ge jetkízdí. Ázírshe Europanyń eshbír qūramasy būl mejege jete alǵan joq.
Jańa jūldyzdar kím?
Manuel Lokatellı (Italıya). Qarapaıym «Sassuolo» komandasynyń ortalyq jartylaı qorǵaushysy būl dodada jarqyraı kóríníp jatyr. Ol Shveıtsarıya qaqpasyna qos dop soqty. Jorjınyu, Barella sıyaqty myqtylarmen óte túsíníse, jaqsy óner kórsetíp jatyr.
Robın Gosens (Germanıya). 18 jasyna deıín futbolǵa ermek retínde qarap, keıín jalǵyz múmkíndíktí sáttí paıdalanǵan Gosens Portugalıya – Germanıya kezdesuíníń taǵdyryn sheshtí. Ol tamasha ekí pas shyǵaryp berdí, ózí de dop soqty.
Denzel Dumfrıs (Nıderland). PSV komandasynyń būl qorǵaushysyn kópshílík qarapaıym, kóp erekshelígí joq futbolshy retínde bíletín edí. Típtí bílmeıtínder de az emes. Osy dodada Dumfrıs qorǵanysty tasqamal etíp ūstauǵa úles qosyp qana qoımaı, Ukraına qaqpasyna jeńís dobyn soqty, Avstrıya qaqpasyn da dál tańbalady. Bıylǵy dodadan keıín oǵan superklubtar qyzyǵushylyq tanytyp jatsa, tańdana qoımaımyz.