Esírtkímen ūstalǵan tanymal reper Qarakesek kóshe tazalap júr, – dep habarlaıdy aqshamnews.kz tílshísí.
Óner ıesí Nauryz merekesínen keıín jūmysqa kírísíp, belgílengen 100 saǵatty ótep jatyr.
SMARTNEWS.KZ basylymynyń habarlauynsha, Qarakesek laqap atymen belgílí ánshí Omar Amantaev sot úkímíne sáıkes qoǵamdyq jūmysqa tartylyp, Aqtóbede kóshe tazalau jūmystaryna kírístí. Aqtóbe qalasy ákímíníń baspasóz qyzmetíníń málímetínshe, sot qaulysy Almaty audany ákímdígíne joldanǵan.
Óz kezegínde audan ákímdígí ony qaladaǵy tazalyqqa jauapty merdíger ūıym – Damu Life JShS-ne bekítken. Kompanıya basshysy Jandos Erekeshovtíń aıtuynsha, ol Nauryz merekesínen keıín jūmysqa kírísken. Qazír ol belgílengen 100 saǵattyq qoǵamdyq jūmys ayasynda kóshe tazalaushy retínde eńbek etíp jatyr.
"Ol bízge jíberíldí, qazír kóshe tazalau jūmystaryn atqaryp jatyr. Belgílengen uaqyt tolyq óteledí. Kompanıya qyzmetkerleríne qatysty qosymsha aqparat berílmeıdí. Bízdíń ūıym Aqtóbedegí Zarechnyı tūrǵyn alabyna jauapty. Mūnda ayaldamalar, jayau júrgínshíler joly men sayabaqtar tazalanady", – dedí kompanıya ókílí.
Eske salaıyq, byltyr kúzde Aqtóbede esírtkíge mas kúıde kólík basqarǵan Qarakesek ūstalǵan bolatyn. Sot sheshímímen ol 15 táulíkke qamalyp, 7 jylǵa kólík júrgízu qūqyǵynan aıyryldy. Sonymen qatar esírtkí qūraldaryn zańsyz paıdalanu deregí boıynsha qylmystyq ís qozǵalǵan. Sotta Omar Amantaev óz kínásín moıyndaǵan.