Qazir QR İİM Ulttyq ulany qatarynda Baýyrjan esimdi 249 áskerı qyzmetshi Otan aldyndaǵy boryshyn ótep júr. Bul esim elimizdiń tarıhynda da, áskerı dástúrde de erliktiń, ar-namystyń jáne Otanǵa qaltqysyz qyzmet etýdiń nyshanyna aınalǵan.
Baýyrjan esimi elimizdiń Qarýly kúshterinde aıryqsha oryn alady. Bul, eń aldymen, aty ańyzǵa aınalǵan qolbasshy, Keńes Odaǵynyń Batyry, jazýshy ári oıshyl Baýyrjan Momyshulynyń ómir jolymen tikeleı baılanysty. Onyń taǵylymǵa toly ǵumyry men maıdandaǵy tájirıbesi Otan qorǵaýshylardyń talaı býynyna rýhanı baǵdar boldy. Al tártip, jaýapkershilik pen otansúıgishtikke negizdelgen qaǵıdattary búgingi kúnge deıin ózektiligin joǵaltqan joq.
Almaty qalasyndaǵy Ulttyq ulannyń 5571 áskerı bólimine Keńes Odaǵynyń Batyry, Halyq qaharmany, gvardıa polkovnıgi Baýyrjan Momyshulynyń esimi berilýi erekshe sımvoldyq mánge ıe. Jeke quram úshin bul zor mártebe ǵana emes, sonymen qatar áskerı-qyzmettik mindetterdi oryndaý barysynda kásibılik, tabandylyq pen adaldyq tanytyp, uly batyrdyń atyna laıyq bolý qajettigin eske salatyn joǵary jaýapkershilik.
— Baýyrjan Momyshuly men úshin erlik pen tártiptiń, shynaıy patrıotızmniń jarqyn beınesi. Onyń esimi maǵan erekshe jaýapkershilik júkteıdi. Bul meni ańyzǵa aınalǵan batyrdyń dańqty jolyn laıyqty jalǵastyrýǵa mindetteıdi. Ulttyq ulan qatarynda qyzmet etý – men úshin úlken abyroı. Negizgi maqsatym – áskerı antqa adal bolyp, elimizdiń azamattarynyń tynyshtyǵy men qaýipsizdigin qamtamasyz etý, — deıdi 5517 áskerı bóliminiń merzimdi qyzmettegi sarbazy qatardaǵy Baýyrjan Tólemaǵamet.
2025 jyly Qazaqstanda ańyzǵa aınalǵan qolbasshynyń týǵanyna 115 jyl tolýy keń kólemde atalyp ótýde. Osyǵan oraı Ulttyq ulan bólimshelerinde áskerı-patrıottyq rýhty nyǵaıtýǵa, tarıhı jadty saqtaýǵa jáne jas áskerı qyzmetshiler arasynda qaharmannyń ónegesin keńinen nasıhattaýǵa baǵyttalǵan eske alý, tárbıelik jáne aqparattyq is-sharalar uıymdastyrylýda.
Aıta ketý kerek, Baýyrjan Momyshulynyń «Soǵys psıhologıasy» jáne «Ushqan uıa» eńbekteri quqyqtyq tártip áskerlerindegi memlekettik-quqyqtyq jáne jaýyngerlik daıarlyqtyń rýhanı-tájirıbelik negizine aınaldy.
Búginde Ulttyq ulan sapynda Baýyrjan esimdi júzdegen ulandyqtyń qyzmet etýi – áskerı dástúrlerdiń sabaqtastyǵy men qazaq halqynyń jaýyngerlik dańqy tarıhynda máńgilik oryn alǵan tulǵa murasynyń aıqyn belgisi retinde qabyldanady.