Búgín Senat Qazaqstanda eńbek jaǵdaılaryn jaqsartuǵa jáne jūmyskerlerdíń qūqyqtaryn qorǵaudy kúsheıtuge baǵyttalǵan zańdy qabyldady. Zańǵa sáıkes, būdan bylaı eńbek shartynyń ornyna azamattyq-qūqyqtyq sıpattaǵy (AQS) sharttardy jasasuǵa bolmaıdy, – dep habarlaıdy aqshamnews.kz tílshísí.
Qūjat eńbek qatynastaryn retteuge jáne azamattardyń áleumettík qorǵaluyn arttyruǵa qatysty bírqatar ózgerísterdí qarastyrady. Atap aıtqanda, zań ís júzínde eńbek qatynastaryn retteıtín jaǵdaılarda azamattyq-qūqyqtyq sıpattaǵy sharttardy (AQS) jasasuǵa tyıym salady.
Mūndaı belgílerge mynalar jatady:
jūmystyń belgílí bír mamandyq nemese lauazym boıynsha oryndaluy;
jūmystyń kompanıyanyń íshkí tártíbíne baǵyna otyryp, jeke ózí oryndauy;
eńbekaqynyń túpkílíktí nátıje úshín emes, eńbek protsesí úshín tólenuí.
Būdan bólek, 14 jasqa deıíngí balalardy tárbıelep otyrǵan jalǵyzbasty ata-analardy jūmys berushíníń bastamasymen jūmystan shyǵaruǵa tyıym salynady. Būl shekteu shtat qysqartylǵanda nemese óndírís kólemí azaıǵan jaǵdaıda da qoldanylady.
Eńbek daularyn sheshu kezínde kelísu komıssıyalarynyń jūmysyna endí táuelsíz deldal tartyluy múmkín. Taǵy bír norma boıynsha, óndírístegí jazataıym oqıǵalardy tergeu komıssıyasynyń qūramy keńeıtíldí – oǵan advokat, zardap shegushíníń jūbaıy nemese zaıyby, sondaı-aq zań keńesshísí qatysa alady.