Memleket basshysy Qasym-Jomart Toqaev Qazaqstan Respublıkasy men Tájíkstan Respublıkasy arasyndaǵy dostyq pen yntymaqtastyqty nyǵaıtuǵa qosqan aıryqsha úlesí úshín Tájíkstan Prezıdentí Emomalı Rahmondy elímízdíń eń joǵary memlekettík nagradasy – «Altyn Qyran» ordenímen marapattady, dep habarlaıdy Almaty-akshamy.kz. Aqordaǵa sílteme jasap.
Qasym-Jomart Toqaev Qazaqstan men Tájíkstannyń bauyrlas halyqtary arasyndaǵy dostyqty, ózara túsínístík pen yntymaqtastyqty nyǵaıtuǵa Emomalı Rahmonnyń qosqan orasan zor úlesín atap óttí.
«Bíz árdaıym barlyq deńgeıdegí tyǵyz jáne senímdí sayası dıalogty qoldaımyz. Elderímíz arasynda berík sharttyq-qūqyqtyq baza qalyptasty. Sauda-ekonomıkalyq yntymaqtastyq qarqyndy damyp, mádenı-gumanıtarlyq baılanystardyń ayasy ūdaıy keńeıíp keledí. Bíz Ortalyq Azıyadaǵy jan-jaqty yntymaqtastyqty nyǵaıtuǵa úles qosa otyryp, asa mańyzdy halyqaralyq qūrylymdar ayasynda ózara tabysty áreket etíp kelemíz. Búgínde memleketaralyq baılanystarymyzdyń odaqtastyq qatynas deńgeıíne kóterílgení quantady. Būl Sízdíń ekí el arasynda úlgílí qarym-qatynas qalyptastyruǵa erekshe atsalysqanyńyzdyń nátıjesínde múmkín boldy», – dedí Memleket basshysy.
Óz kezegínde E.Rahmon eldíń joǵary memlekettík nagradasymen marapattalǵanyna rızashylyǵyn bíldírdí.
«Qūrmettí Qasym-Jomart Kemelūly, mení «Altyn Qyran» ordenímen marapattau jónínde sheshím qabyldaǵanyńyz úshín Sízge alǵys aıtamyn. Būl nagrada, eń aldymen, búkíl Tájíkstan halqynyń tájík-qazaq qatynastaryn, dostyǵy men yntymaqtastyǵyn damytuǵa jáne nyǵaıtuǵa qosqan úlesí úshín berílgen joǵary baǵa dep bílemín. Bauyrlas halyqtarymyzdyń ıgílígí úshín Tájíkstan men Qazaqstan arasyndaǵy strategıyalyq seríktestíktí jan-jaqty nyǵaıtuǵa jáne keńeıtuge aldaǵy uaqytta da bar kúsh-jígerímízdí salatynymyzǵa senímdímín», - dedí Tájíkstan basshysy.
Aıta keteıík, keshe Qasym-Jomart Toqaev Qazaqstanǵa memlekettík saparmen kelgen Tájíkstan Prezıdentí Emomalı Rahmondy elorda áuejaıynda qarsy aldy.
Al 3 mamyrda Qazaqstan-Tájíkstan bıznes-forumynda bírqatar mańyzdy qūjatqa qol qoıyldy.
Búgín qos eldíń basshylary shaǵyn qūramdaǵy kelíssóz ótkízdí. Óz kezegínde E.Rahmon Astanaǵa memlekettík saparmen keluge shaqyrǵany jáne qazaq halqynyń dástúrlí qonaqjaılyǵy úshín Qasym-Jomart Toqaevqa alǵys aıtty.