QMDB tóraǵasy búgíngídeı syn saǵatta adamdar bír-bíríne qamqor bola túsu kerektígín aıtty
Pandemıyalyq jaǵdaı dín ókílderíníń ruhanı álemín álsírete alǵan joq. Būl turaly Álemdík jáne dástúrlí dínder kóshbasshylary sezí hatshylyǵynyń HÍH otyrysynda Qazaqstan mūsylmandary dínı basqarmasynyń tóraǵasy, bas múftı Nauryzbaı qajy Taǵanūly aıtty, dep habarlaıdy Almaty-akshamy.kz QazAqparatqa sílteme jasap.
«Adamzat balasy san ǵasyrlyq tarıhymyzda talaı syndarly sátter men synaqtardy, zobalań zamandar men náubetterdí bastan keshíp keledí. Álemdí úreılendírgen qazírgí syn sátte de Adam men Hauanyń ūrpaqtary qabyrǵamyzdy qaıystyrmaı, úmítsízdíkke boı aldyrmaı, bír-bírímízge qamqor árí tírekshí bola bíluímíz qajet. Búgínde úreı qūshaǵyna eníp, eleń-alań kúı keshken ár adam úshín jyly sózdíń ózí janǵa daua, kóńílge medeu bolyp tūr. Būl tūsta díndarlar men dín lıderleríníń rólí orasan zor bolyp otyr», - dedí QMDB tóraǵasy.
Bas múftı qazaq halqynda «Betege ketse, bel qalar, berekeń ketse, neń qalar?» degen ataly sóz bar ekendígín eske saldy.
«Alla elshísí aıtqandaı, jaqsy sóılep, aınaladaǵy adamdarǵa shuaq shashyp, úreıge emes, úmítke qanat bítíre bílsek qana, álemdík pandemıyany jeńerímíz anyq. Meníń oıymsha, álemdegí pandemıyalyq jaǵdaı dín ókílderíníń ruhanı álemín álsírete alǵan joq. Pandemıya uaqytynda meshítter men ǵıbadathanalar esígí jabylǵanymen, sauap esígí jabylmaıtyny sekíldí, dín qyzmetkerlerí qoǵamda ízgílík pen meıírím syndy qūndylyqtardy keńínen nasıhattaı bíldí», - dedí Nauryzbaı qajy Taǵanūly.