39 myń fakt anyqtalǵan.
Memlekettik kirister komıtetiniń tóraǵasy Danıar Janálinovtiń aıtýynsha, qyzmetkerler arasynda 2021 jylǵy tabys deklarasıasyn tapsyrýdan jaltarýdyń 39 myń faktisi anyqtaldy, dep habarlaıdy Almaty-akshamy.kz
Qazaqstanda jalpyǵa birdeı tabys deklarasıasyn kezeń-kezeńimen engizýge sheshim qabyldanǵan bolatyn. Aldymen memlekettik qyzmetkerler 2021 jylǵy esebin tapsyrýǵa mindetti.
«570 myńnan astam deklarasıa tústi. Alaıda deklarasıany tapsyrmaý faktileri de boldy. Ondaı adamdardyń sany 39 myń bolǵan. Barlyǵyna tıisti eskertýler jiberilgen. Sonyń nátıjesinde 10 myń adam tabys deklarasıasyn tapsyrdy», - dedi Janálinov ortalyq komýnıkasıalar qyzmetinde ótken brıfıńte.
Onyń aıtýynsha, qazirgi kezde qalǵan 29 myń adamnyń deklarasıany ne sebepti tapsyrmaǵany anyqtalyp jatyr. Olar da túsinikteme berýi tıis. Tabys deklarasıasyn tapsyrmaǵan memlekettik qyzmetkerlerdiń arasynda jumystan shyǵyp ketken adamadar da bolýy múmkin. Biraq olar týraly málimetter komıtette qala beredi.
«Aıyppuldar salynbaǵan, barlyǵyna eskertý túrinde ákimshilik shara qoldanyldy», – dep atap kórsetti Janálinov.
Aıta keteri, tabys pen múlik týraly deklarasıa tapsyrý sharalary memlekettik qyzmetkerler men olardyń jubaılarynan bastalǵan. 2023 jyly memlekettik kásiporyndarda (bilim berý, densaýlyq saqtaý, mádenıet, sport) isteıtin qyzmetkerler men olardyń jubaılary deklarasıa tapsyrýǵa mindetteledi.