Ókpeníń sozylmaly obstruktıvtí auruy (ÓSOA) - tynys alu músheleríníń eń keń taralǵan auruy, sonymen qatar júrektíń ıshemıyalyq auruy men ınsultten keıíngí álem boıynsha ólímníń úshínshí sebebí.
ÓSOA-men auyratyn nauqastardyń shamamen jartysynda auru uaqtyly anyqtalmaı, olar basqa dıagnozdarmen: sozylmaly bronhıt, demíkpe boıynsha baqylauda bolady.
«Densaulyq saqtau mınıstrlígíníń bastamasymen 2025 jyldyń qazan aıynda eldíń barlyq óńírlerínde medıtsınalyq-sanıtarıyalyq alǵashqy kómek deńgeıínde ÓSOA-ny erte dıagnostıkalau men nauqastardy basqaru daǵdylaryn jetíldíru, sondaı-aq spırometrıya (aurudy anyqtaudyń negízgí ádísí) ótkízu jáne nátıjesín túsíndíru sapasyn arttyru boıynsha oqytu semınarlary óttí. S.Qaıyrbekova atyndaǵy Densaulyq saqtaudy damytu ūlttyq ǵylymı ortalyǵynyń derekterí boıynsha, qazírgí tańda ÓSOA dıagnozymen 70 myńnan astam nauqas dıspanserlík esepte tūr. Olardyń 5–10%-í aurudyń asa auyr satysynda. Jyl saıyn shamamen 20 myń jańa jaǵdaı tírkeledí. Kóbínese būl auru jasy úlken, ūzaq jyldar boıy temekí shegetín er adamdarda, sondaı-aq shań men tútínge kásíbı áserí bar adamdarda kezdesedí. Osy jasta jıí baıqalatyn júrek-qantamyr aurulary ÓSOA klınıkalyq kórínísín auyrlatady jáne auru boljamyna áser etedí», — deıdí professor, m.ǵ.d., Kardıologıya jáne íshkí aurular ǴZI jetekshí pulmonology Sáule Qasenova.
ÓSOA - būl tynys joldary men ókpe tíníníń ıngalyatsıyalyq zıyandy bólshekterdíń áserínen damıtyn sozylmaly qabynuynyń saldary.
Aurudyń negízgí belgísí - entígu (demígu), ol uaqyt óte kele kúsheıe túsedí.
Auyr túrínde nauqas 100 metr júrgende nemese típtí kıíníp-sheshíngen kezde entígedí. Būl ómír sapasyn tómendetíp, ūıqynyń būzyluyna ákeledí.
ÓSOA asqynuy entígudíń kúsheyuímen, íríńdí qaqyryq bólínetín jóteldíń qosyluymen baıqalady. Asqynu qauíptí, sebebí ol júrek-qantamyr júıesí aurularynyń nasharlauyna, júrek talmasyna, ınsultke, júrek qyzmetí jetkílíksízdígíníń dekompensatsıyasyna jáne arıtmıyaǵa ákeluí múmkín. ÓSOA árbír asqynuy aurudyń aǵymyn auyrlatyp, ólím qaupín arttyrady. ÓSOA men júrek-qantamyr aurularynyń qatar boluy ómír sapasyn tómendetíp, auruhanaǵa jatqyzu jıílígín arttyrady.
Asqynulardyń aldyn alu úshín ne ísteu kerek? Qarapaıym qadamdar: bírtíndep temekíden bas tartu, tūmauǵa jáne pnevmokokk ınfektsıyasyna qarsy egílu, tynys alu jattyǵularyn jasau, fızıkalyq belsendílíktí arttyru jáne jaqsy kóńíl kúı saqtau.
Pulmonolog dáríger ıngalyatsıyalyq em taǵaıyndaıdy, ol tynys aludy jeńíldetíp, entígudí azaıtady. Kún saıyn bronh keńeıtetín dárílerdí qoldanu aurumen kúresuge kómektesedí.
Auyrmańyz!