2026 jyly Almaty qalasynda qala ákímí Darhan Satybaldynyń bastamasy men tapsyrmalary ayasynda engízíletín jańa jobalardyń íshínde halyqtyq, ınklyuzıvtík jáne osy zamanǵy sportty damytuǵa erekshe nazar audarylǵan.
«Sport – dostyq alańy» jobasy barlyq audanda keń auqymda íske asyp, tūrǵyndar men qala qonaqtarynyń oǵan belsendí túrde qatysuyn qamtamasyz etpek. Almaty qalasynyń Sport basqarmasynyń basshysy Darhan Nūrhanūly Óńírlík kommunıkatsıyalar qyzmetínde osylaı dep habarlady.
Nauryz aıynan bastap Almaty Marathon jobasymen bírlesíp «ACTIVE CITY HUB» bastamasy íske qosylyp, ár jeksenbí kúní saǵat 08:00-den 12:00-ge deıín medıa tūlǵalar men fıtnes jattyqtyrushylary qatysatyn sheberlík sabaqtary men shaǵyn ís-sharalar ótpek.
«Bíz būl ís-sharalarǵa 10 000-nan astam qala tūrǵyny qatysady dep otyrmyz», – deıdí Darhan Nūrhanūly.
Sonymen qatar, Qazaqstannyń shou-bıznes jūldyzdarynyń komandalary qatysatyn Media Basket basketbol medıa-lıgasy da bastalady. Būl joba basketboldy tanymal etíp, sport, mádenıet pen medıa arasyndaǵy baılanysty nyǵaıta túsu úshín qolǵa alynyp otyr.
«BLAST PREMIER BOUNTY ALMATY» kıbersport turnırín ótkízu de oılastyrylyp jatyr. Qazír jarystyń kúní men ótetín orny anyqtaldy.
«Būl ís-shara qalanyń kıbersport kartasynda mańyzdy oryn alyp, oıynshylar men kórermenderdíń nazaryn audarady», – dedí Sport basqarmasynyń basshysy.
2026 jyly erekshe balalardy sportqa tartuǵa erekshe kóńíl bólínedí. Arnaıy bílím beruge mūqtaj balalardyń ońaluy, áleumettík beıímdeluí men sportqa qatysuyna baǵyttalǵan balalardyń paralımpıadalyq sportyn damytu baǵdarlamasy da osymen qatarlasa ázírleníp jatyr.
Garvard pen Oksford unıversıtetí qatysatyn Dúnıejúzílík shahmat unıversıadasyn ótkízu, 20 el qatysatyn áuesqoı velosporttan álem chempıonatyn ūıymdastyru, sondaı-aq studenttík lıgany kolledjder lıgasyna keńeıtíp, shamamen 88 kolledj ben 7 myń studenttí qamtu jaǵy da qalanyń josparyna kírgen.
«Bízdíń maqsatymyz – sportty qalanyń barlyq tūrǵyndary úshín qoljetímdí, qyzyqty etu. Almatylyqtardyń árqaısysy dene shynyqtyrumen aınalysuǵa múmkíndík aluy kerek», – dep túıíndedí Darhan Nūrhanūly.