Qazír Chaıkovskıı kóshesíníń Qazybek bıden Áıteke bı kóshesíne deıíngí bólígí jańartylyp jatyr. Aumaǵy 0,6 gektar bolatyn būl shaǵyn keńístíktí ūzaq uaqyt boıy retsíz tranzıttík aımaq retínde paıdalanyp kelgen. «Halyq qatysatyn byudjet» (HQB) baǵdarlamasy ayasynda jergílíktí tūrǵyndardyń bastamasymen būl aumaq endí demalys pen seruendeuge arnalǵan tolyqqandy qoǵamdyq keńístíkke aınala bastady. Almaly audanynyń ákímí ÓKQ baspasóz turynda osy ınfraqūrylymdy jańǵyrtu jūmysynyń barysy turaly aıtty.
Nysandaǵy jūmys bıylǵy 8 mamyrda bastalypty. Jobany qaladaǵy tyǵyz qūrylystyń arasynan tūrǵyndarǵa qolaıly orta qalyptastyru úshín qolǵa alǵan. Aumaqtyń 0,4 gektaryn kógaldanady. Mūnda kógal tóselíp, keńístíktí aımaqtarǵa bólu úshín kópjyldyq būtalar egílíp jatyr. Būǵan deıín bolmaǵan avtomatty suaru júıesí de ornatylmaqshy endí.
0,2 gektar aumaqta jańa qatty jabyn tóselíp jatyr. Merdíger ūıym 985 sharshy metr sapaly tas tóseme men 250 sharshy metr asfalt jabyndysyn tóseıdí. Jazdyń aptap ystyǵynan qorǵanu úshín kóleńkelík shatyr men pergola ornatylady. Qarańǵy aumaqtardy joyu maqsatynda 400 metr kabel tartylyp, 27 jańa jaryq baǵanasy da ornatylady.
Jańarǵan qoǵamdyq keńístíktí jergílíktí tūrǵyndar qazírdíń ózínde joǵary baǵalap otyr. Qazybek bı kóshesí, 85-úıdíń tūrǵyny Janat Púlíbaıqyzy Ízjanovanyń aıtuynsha, abattandyrudan keıín aumaq tūrǵyndardyń demalysy men seruendeuíne áldeqaıda jaıly bola túsken.
«Bízdíń aula tūrǵyndardyń súıíktí orny bolatyn, endí típtí kórkeıíp kettí. Avtomatty suaru júıesí ornatyldy, yńǵaıly oryndyqtar qoıyldy, sport pen balalar alańy jańardy. Abattandyrudyń arqasynda jer naǵyz sayabaqqa aınalǵandaı áser qaldyrady. Kóp raqmet sízderge!», – dedí Janat Ízjanova.
«Chaıkovskıı kóshesí sıyaqty shaǵyn aumaqty abattandyru jaryqtyń jetíspeuí, búlíngen trotuar men jasyl jelektí suaru sıyaqty tūrǵyndardyń kúndelíktí máselesín sheshuge sep bolmaq. Bíz bos tranzıttík aımaqtardan bas tartyp, adamdar kóleńkede otyryp tynyǵa alatyn funktsıonaldy qoǵamdyq keńístík qalyptastyryp jatyrmyz. Būl – óz aulasy men kósheníń taza, jaıly bolǵanyn qalaıtyn tūrǵyndardyń naqty sūranysyna berílgen jauap», – deıdí Almaly audanynyń ákímí Arman Shamshın.