Belgili ádebıet synshysy ári rejıser Ǵalym Dosken ómirden ótti, - dep habarlaıdy Aqshamnews.kz tilshisi.
Belgili fılolog, ádebıet zertteýshisi, rejıser jáne senarıst Ǵalym Dosken dúnıeden ótti. Ol 1960 jyldyń 19 shildesinde týǵan.
Ǵalym Dosken Abaı atyndaǵy Qazaq pedagogıkalyq ınstıtýtyn támamdaǵan. Eńbek jolynda otandyq teleóner men mádenıetke aıtarlyqtaı eńbek sińirdi. 2001–2002 jyldary «Qazaqstannyń respýblıkalyq televıdenıe jáne radıo korporasıasy» JAQ basqarma tóraǵasynyń birinshi orynbasary, 2002–2006 jyldary «Qazaqstan» RTRK basqarma tóraǵasy qyzmetin atqardy. 2007 jyldan beri «El» prodúserlik ortalyǵynyń kórkemdik jetekshisi boldy.
Ol «Sáýleni kútý», «Uly dala astanalary», «Mańǵystaý qabirleriniń túsi», «Joǵalǵan jaryq hronıkasy» syndy derekti fılmderdiń, «Toǵyz quıryqty aq túlki», «Sıqyrly fleıta», «Bıleıtin qus» kitaptarynyń avtory. Sonymen qatar «Jeztyrnaq» baletiniń lıbrettosyn jazǵan.
Qazaq mádenıetine, telejýrnalıstıkasyna jáne ádebıetine ólsheýsiz úles qosqan talantty tulǵanyń qazasy el úshin úlken qaıǵy boldy. Marqumnyń týǵan-týystaryna, jaqyndaryna kóńil aıtamyz.