Mańǵystaý oblysynyń Beıneý aýylynda eki bala jabaıy janýar shabýylynan jeńil jaraqat aldy. Bul týraly óńirlik densaýlyq saqtaý basqarmasy málimdedi, - dep habarlaıdy Aqshamnews.kz.
21 qarashada ortalyq aýdandyq aýrýhananyń travmpýnktine ata-analarymen birge eki bala júgingen. Medısınalyq derekterge sáıkes, mektep oqýshylaryna qarsaq (dala túlkisi) dep kórsetilgen janýar shabýyl jasaǵan.
2011 jyly týǵan jasóspirimniń oń aıaq sıraǵynan, al 2018 jylǵy balanyń sol aıaǵynan jara anyqtalǵan. Dárigerler olarǵa qajetti vaksınalardy engizgen. Qazirgi ýaqytta balalardyń jaǵdaıy qanaǵattanarlyq, olar ambýlatorlyq baqylaýda.
Aımaqtyq ekologıalyq keńes tóraǵasy Ádilbek Qozybaqov janýardyń sýretin zertteı kele, onyń qarsaqtan góri kádimgi túlkige kóbirek uqsaıtynyn atap ótti. Onyń aıtýynsha, jabaıy ańdar qutyrý vırýsyn tasymaldaýy múmkin, sondyqtan olardan saq bolý qajet.
Maman mundaı jaǵdaı bolǵanda birden tıisti qyzmetterge habarlap, kez kelgen jaraqat kezinde dereý medısına qyzmetkerlerine júginý keregin eskertti.