Jetisý aýdanynyń ákimi aýdandaǵy abattandyrý men ınfraqurylymdy damytýdy kózdeıtin negizgi jobalar týraly aıtty
Óńirlik komýnıkasıalar qyzmetinde ótken baspasóz konferensıasynda Jetisý aýdanynyń ákimi Lázzat Jylqybaeva aýdan kóleminde qolǵa alynǵan abattandyrý, ınjenerlik jelilerdi jańǵyrtý men jaıly qalalyq ortany qalyptastyrýdy kózdeıtin jobalarmen tanystyrdy.
Aýdan ákimi atap ótkendeı, 2025 jyly Jetisý aýdanynda turǵyndardyń ómir súrý sapasyn arttyrýǵa baǵyttalǵan aýqymdy baǵdarlama iske asyrylyp jatyr. «Jumysty kezeń-kezeńimen, júıeli túrde júrgizilip jatyrmyz. Qoǵamdyq keńistikterdi abattandyrýǵa, qaýipsizdikti arttyryp, ınjenerlik ınfraqurylymdy jańartýǵa kóp kóńil bóldik», – dedi Lázzat Jylqybaeva.
Basty basymdyqtyń biri – tótenshe jaǵdaıdyń aldyn alý. «Qala ákiminiń tapsyrmasyna sáıkes Shelıhov pen Volochaevskaıa kóshesindegi betkeılerdi bekitý jumystary aıaqtaldy. Syrǵyma qaýpi joıylyp, turǵyndar endi alańsyz ómir súretin boldy», – dep atap ótti ákim.
Sondaı-aq, birqatar mańyzdy aýmaqtardyń abattandyrylǵany týraly aıtyldy: «Kókmaısa shaǵyn aýdanyndaǵy saıabaq aımaǵy, Kókjıek shaǵyn aýdanyndaǵy Esentaı ózeniniń boıyndaǵy jaǵalaý men Chernovıskaıa kóshesiniń ýchaskesi jańartyldy. Atalǵan jerlerge balalar men sport alańdaryn ornatyp, kógaldandyryp, jaryq tartylyp, kishi arhıtektýralyq formalar qoıyldy».
Azamattyq bastamanyń mańyzdylyǵyna toqtala otyryp, Lázzat Jylqybaeva «Halyq qatysatyn búdjet» baǵdarlamasynyń rólin erekshe atap ótti: «2025 jyly HQB aıasynda 2 mıllıard teńge kóleminde 30 joba iske asyrylyp jatyr. Bul – aýlany, jaıaý júrginshiler aımaqtaryn abattandyrýdan bastap, jasyl aýmaqtar men avtomatty sýarý júıelerin ornatýǵa deıingi turǵyndardyń bastamasy».
Ákimniń aıtýynsha, qazirgi tańda Qarasý ózeniniń boıyndaǵy jaǵalaýdy abattandyrý qolǵa alynǵan. «Joba qala turǵyndaryna arnalǵan taǵy bir jaıly qoǵamdyq demalys ornyn ashýǵa múmkindik beredi», – dedi ol.
Múmkindigi shekteýli azamattar úshin kedergisiz orta qalyptastyrýǵa erekshe kóńil bólingen. «Qazirgi ýaqytta 13 jer ústi jaıaý júrginshiler ótkelindegi kótergishterdi jóndeý men aýystyrý jumystary júrgizilip jatyr. Bul – az qozǵalatyndarǵa óte qajet», – dep atap ótti ákim.
«Aınabulaq-2 jáne Aınabulaq-4 shaǵyn aýdandaryndaǵy Esentaı ózeniniń jaǵalaýlaryn, Kókmaısa shaǵynaýdanyndaǵy skverdi, Palladın kóshesindegi jaıaý júrginshiler aımaǵyn jáne 42 aýla aýmaǵyn kúrdeli jóndeý boıynsha jobalyq-smetalyq qujattama ázirlenip jatyr. Barlyq aýmaq osy zamanǵy standarttar men turǵyndardyń qajettiligin eskere otyryp abattandyrylady», – dedi Lázzat Jylqybaeva.
Aýdan basshysy ınjenerlik ınfraqurylymdy jańǵyrtý boıynsha da derekterdi usyndy. «Almaty Sý» SHKK-men birlesip, uzyndyǵy 3,6 shaqyrym bolatyn alty ýchaskede sý men káriz jelisin qaıta jańartý jumystary júrgizilip jatyr. Sonymen qatar, «Almaty jylý júıeleri» JSHS Aınabulaq-1 shaǵynaýdanynda jylý jelilerin kúrdeli jóndeýge baǵyttalǵan eki jobany júzege asyra bastady», – dedi ákim.
Sóz sońynda Lázzat Jylqybaeva aýdannyń respýblıkalyq «Taza Qazaqstan» ekologıalyq aksıasyna belsendi qatysyp jatqanyn atap ótti: «Jetisý aýdany «Taza Qazaqstan» bastamasyn qoldaıdy. Biz tazalyq ornatyp qana qoımaı, qorshaǵan ortaǵa jaýaptylyqpen qaraıtyn mádenıetti de qalyptastyryp jatyrmyz».